الإفساد

لتعلم ما معنى أن يكون الإنسان نقطة في خط الإفساد. 
وكيف تصبح الفضيحة الكارثية، عادة مقبولة ومستثاغه.
دعني أخبرك، أنه عندما قام مبتدع المايوة البكيني بمحاولة إيجاد من ترتدي هذا الثوب الفاضح لعرضه على الجماهير.
جميع عارضات الأزياء الباريسيات رفضن أن يرتدينه. 
ولم تقبل بهذه المهمة إلا راقصة تعرِ. !
هل تتخيل؟ 
ما كان مرفوضا من عارضات الأزياء، ولم يقبل به غير العاهرات. 
أصبح أمرا عاديا، لا يعترض عليه الكثيرون في هذا الزمان .. !
----
وكله في سياق الدراما.
----
المجد للفن والقيم الجمالية !
****
مخاميخ شتوية: عدنان القماش.

https://www.facebook.com/Mkhamekh

الخريطة لا تزال في موبايلي

كنت طالع أعمل مشوار في مصلحة حكومية، وده بيكون من أسود الأيام اللي بتمر بحياتي.
المهم قولت أدخل أشوف عنوان المصلحة ومكانها من على النت، بضرب الاسم، وسبحان الله طلعت نتائج.
ما صدقتش نفسي، قولت مش ممكن، خصوصا لما لقيت الموقع بتاع النت بيقولي: أضغط هنا لو عايز تشوف الخريطة بتاعت المكان على جوجل.
انبهرت ! ممكن؟ مصر فيها كده...مستحيل؟
وأنا بضغط الزرار بتاع الماوس، إيدي بترتعش وقلبي بيدق جامد، وهووووب، طلعت الخريطة فعلا.
مش ممكن، طرت من السعادة وأخدت الخريطة معايا على الموبايل، وأنا في منتهي الاعتزاز والثقة.
نعم، اليوم فقط سننافس الهند التي ستصعد للمريخ.

تاني يوم الصبح، نازل المشوار وأنا كلي ثقة.
بقول لسواق التاكسي: أنت عارف المكان.
فكر شوية، وبعدين قالي: آه أعرفه.
في نفسي قولت بكل ثقة: "ولو ما تعرفهوش، أنا معايا الخريطة يا معلمي. خلاص يا باشا أحنا عدينا"
مشينا في حواري، ودخلنا في أسواق، وشقينا بحور ومحيطات، اللي هي طبعا مواسير ماية ضاربة.
لحد ما وصلنا لزقاق منحدر بنفس درجة انحدار شلالات نياجرا.
السواق قالي: أنا فاكر إني كنت بدخل من هنا.
قولت له: يا رجل؟ بس ده منحدر خطير.
وفي عقلي بقول: وكمان الخريطة ما كنش باين فيها خالص المنحدر ده.
قالي: خلينا نتوكل.
قولت له: ولا يهمك توكل.
الحمد لله نجونا بأعجوبة من المنحدر، ورجعنا تاني نمشي في حواري، ونطلع منحدرات، لحد ما وصلنا للمكان.
وكلي سعادة أن الخريطة لم تكذب، هذه هي مصر المستقبل، هذه هي مصر التاريخ، 7000 عاما من الحضارة لم تذهب هباء.

يافطة المكان مش فاضل منها غير اللمبات النيون !
ناس قاعدة بتضرب شيشة قصاد المصلحة الحكومية. عيني خبطت في اكوام الزبالة المتراكمة جنب المكان.
مش مهم، المهم الخريطة الإلكترونية وصلتنا.

السواق فوقني من أفكاري، صدمني وهو بيقول: ما تسأل كده يا أستاذ، أحسن يكونوا نقلوا المكان؟
قلبي اتنفض...بس أكيد خير يعني.
أقدم رجل وأخر رجل، لحد ما قربنا من الناس اللي بيدخنوا الشيشة.
- هو مش حضرتك دي الجهة الحكومية الفلانية.
- آه كانت هنا، بس نقلوها في المكان الفلاني.
- يا رجل؟ طب ما نقلوهاش السلوم ليه؟

وطلعت رحلة تانية في بلاد ما وراء الزحام، وبلاد تركب المواصلات.
ولكن هذا أمر شرحه يطول وأنا الليلة مقتول.
-----
وفيها حاجة حلوة...حاجة حلوة خالص...
بس فين مش عارف؟
خلونا ندور في الخريطة كده !
----
المجد للخرائط.
****
مخاميخ شتوية: عدنان القماش.
<<<حدث بالفعل<<<
https://www.facebook.com/Mkhamekh

المجد للقرطسة

أرفع القبعة للساخر الجامد باسم يوسف، صاحب الموهبة الفذة وكابتن فريق العمل الكبير، وتلك القناة الوطنية التي تنفق ببذخ وسخاء لنشر المحبة والدفاع عن الوطن وثورته المجيدة.

أثبت باسم أن لديه القدرة على "فشخ" - حسب تعبيراته - أي أحد. 
مع المحافظة على قدراته في استخدام الإيحاءت الجنسية.
وأشكر له هذه الحملة الدعائية للفريق السيسي.
"الدكر الجامد اللي الناس بتحبه وبتخاف منه، بس يا رب ما يتحولش لفرعون" 

كنت أنتظر أن تحدثنا عن القطارات المعطلة لثلاث أشهر، وسعر كيلو البطاطس الذي أصبح ينافس دخل السياحة من معبد أبوسمبل، ونزيف الشركات الكبرى التي تترك البلاد، والديون التي وصلت لمستويات قياسية جديدة. ولا أنسى التسول من دول الخليج ؟!
وكذلك قانون التظاهر، وقانون الإرهاب، ولجنة الخمسين.

ألم تدرك بموهبتك الفذة، أن كل الدماء التي سالت كانت بسبب "سلم الديمقراطية" 
"سلم" يا بسوم، تخيل؟
ألم يكن باستطاعتك أن تترجم كلمة: "وعشمعشف"
هل وجدت الجملة التالية طبيعية: "أنا مش هحلف...بس أقسم بالله العظيم". 
أين الحديث عن النحس والفقر وكثرة الحوادث...كما كنت تلصق هذه الأمور بمرسي؟!

دع عنك هذا، 
لماذا لم تأت على سيرة نوال؟ 
فقط تظهره كأنه الحبوب الأعظم؟ 
ألم ترى صورته في إفطار رمضان مع تلك الثائرة - سابقا -، الصورة التي أحسبها سبب حصوله على لقب "نوال"؟ 
ألم تثر الصورة بداخلك شيئا لتسخر منه؟ أم أن البيادة لا تسمح بغير تلميعها؟

لكن حسبنا في الوقت الراهن، ما فعلته بلميس وخيرت وموسى. 

وسأنتظر منك الحديث عن الشكل الكوميدي للبحث عن ابنائنا وإخواننا وأصدقائنا وجيراننا الذين تفحموا، ولا يعثر عليهم ذويهم إلا بفصح ال DNA. 
لعل الشعب العظيم يجد ما يضحكه على ضياع قيمة الإنسان.

سأنتظر الكثير والكثير، وسأقنع نفسي أنها الحلقة الأولى، التي سيأتي بعدها طوفان الدفاع عن الحق ونصرة الوطن والثورة المجيدة في حلقاتك القادمة !
-----
المجد للقرطسة.
****
مخاميخ شتوية: عدنان القماش.

https://www.facebook.com/Mkhamekh

الشخصية العشوائية

فين المشكلة؟
تقدر تعرفها لما تشوف ردود أفعالنا مع مباراة غانا.

قبل المباراة، تشوف أمال وطموحات لا علاقة لها بالواقع. 
ويمكن تلاقي عذر لعدم الواقعية، لأن كرة القدم لا تعترف إلا بالمجهود في الملعب. ويمكن ده من ميزات وسر متعة كرة القدم.

لو كنا كسبنا: 
كنا هنقول عبقرية الشخصية المصرية، والتي تقهر الصعاب والتحديات. والوصول لكأس العالم عبر طريق من الأشواك، رغم عدم وجود نشاط رياضي.

ولما خسرنا، تلاقي الكلام:
معلهش النشاط الرياضي متوقف، وكويس إننا وصلنا لحد كده في الظروف دي.

ولما الخسارة تزيد قوي: تلاقي الكلام عن الوكسة، وبردود أفعال عنيفة.
وتلاقي المعلق بتاع المباراة مثلا يقولك: "بابا أوبح" أغنية تعبر عن الشيل !

وبعدين تختفي كل ردود الفعل، وتنتهي الوكسة وكأنها لم تكن، حتى الوصول لوكسة جديدة.
----
المجد للشخصية العشوائية.
***
مخاميخ صيفية: عدنان القماش.

https://www.facebook.com/Mkhamekh

شبكة الفواكة والخضار ؟!

يا جماعة الخير،،،
أنا مش عارف ليه الناس زعلانة من قصة إرتفاع الأسعار ؟
دي ميزة للعلم !
وهتبقى سبب في تسهيل عملية الزواج، وحذف ركن الشبكة ؟!

يعني بعد كده هتجيب لزوجة المستقبل: 
إسورة من حلقات البصل، كردان من حبات العنب، وخلخال من الكرفس.
بتكلفة عشرة آلاف جنية بس ؟!
ولو حبيت تدلع المحبوبة بقى، تجيب لها دبلة من ال"شبت".
وللعلم، "شبت" إن الكلام ده في الهجايص.
----
كل التحية للمطربة العظيمة "شفيقة"، واللي سبقت عصرها، 
كأول واحدة ترضى بشبكة الفواكة والخضار، 
وأطربتنا بصوتها العجيب وقالت: 
"جابلي العنب يا أمه...قطف لي حبه اللي استوى"
----
المجد للعدالة الإجتماعية.
****
مخاميخ صيفية: عدنان القماش.

https://www.facebook.com/Mkhamekh

سياحة عصير القصب !

إرهابي 1: بقولك إيه؟ أنا بعد المذبحة دي، روحي وخداني أكمل حياتي في المنطقة هنا.
إرهابي 2: بس يا عم أحسن الأمن يجي يقبض علينا؟
إرهابي 1: لا يا رجل ما تخفش...دي مذبحة صغيرة، وما حدش هيهتم باقتحام المنطقة. هي الدولة فاضية، بيقولك الدولة بتحارب الإرهاب بعيد عنك ؟!
إرهابي 2: يا رجل؟! ... طب بما إننا هنستقر هنا، إيه رأيك نفتح مشروع عصير قصب؟
إرهابي 1: طول عمرك عملي يا "إرها" يا خويا...وأهو نساعد على تنشيط السياحة في ربوع الوطن الحبيب !
-------
كل الشكر لقوات الأمن التي انتظرت حتى الأربعين، لتبحث عن الإرهابيين المجرمين، وتدك حصونهم.
----------
المجد لسياحة عصير القصب !
****
مخاميخ صيفية: عدنان القماش.

https://www.facebook.com/Mkhamekh

الإرهاب له أصوله... !

بس بيني وبينكم،،،

الله يخرب بيت الفشل على سنينه.
كل حاجة في البلد دي فاشلة...حتى الإرهاب؟

يا جدعان الإرهاب له أصوله... !
يعني الرجل اللي تعب نفسه 
وقعد يعمل القنبلة، ويزرعها، ويرويها، لحد ما تكبر، وتطرح، وتنفجر.
الرجل ده عمل كل ده على سبيل العمل الخيري مثلا؟ 
ولا عنده رسالة عايز يوصلها؟

طب يا عم الحاج...مش تعرفنا أنت مين وعايز إيه؟
وليه فرقعت القنبلة دي ... ولا هي رخامة كده وخلاص؟
مش تخليك رجل وأد قنبلتك !

بس هنقول إيه...
أدي آخرة التعليم المجاني ؟!
-----
بس سيبك أنت...ساعة الانفجار ما تتعوضش !
حسبنا الله ونعم الوكيل.
***
مخاميخ صيفية: عدنان القماش.

https://www.facebook.com/Mkhamekh

إنها الحرب القذرة !

إنها الحرب القذرة !

"سيارة مفخخة تنفجر ؟!"

ستقولون فعلها إرهابي حقير.
ستقولون فعلها غاضب يثأر لدم.
ستقولون أنها تمثيلية لمد حالة الطوارئ.
ستقولون فعلوها لتقسيم الشعب أكثر.
ستقولون فعلوها ليتخلصوا من فصيل بعينه.

قولوا ما تشاءون...
لكن استعدوا جيدا لسنوات الرعب القادمة... !

القتل لن يكون مؤقتا، كما قالوا لكم...
القتل ليس ببعيد عنكم، كما حاولوا إقناعكم...
ستستيقظون على دم...وتبيتون على دم...
وللأسف قد يطال الدم أقرب الناس لكم...
إنها الحرب القذرة !
------
يا رب يخيب ظني.
يا رب أحفظ مصر وأهلها من كل سوء.
وحسبنا الله ونعم الوكيل.
***
مخاميخ صيفية: عدنان القماش.

https://www.facebook.com/Mkhamekh

إحنا شعب وأنتو شعب ؟!

"إحنا شعب وأنتو شعب"
طب هنقسم الأهرامات إزاي...يا بن الشعب؟
ولا هتقولي: 
أحنا هناخود خوفو ومنقرع...وانتوا هتاخدوا خفرع وأبو الهول؟!

أقدر أقولكم مبروك يا ولاد: 
بقت 600 حتة
-----
المجد للمهاطيل
-----
اللهم لا تؤاخذنا بما فعل السفهاء منا.
يا رب ألطف بمصر وأهلها.
يا رب لا تُحكم فينا سفهاء هذا الوطن.
اللهم آمين...
***
مخاميخ صيفية: عدنان القماش.

https://www.facebook.com/Mkhamekh

المجد للمريشين !

بعد قصة الطائر الجاسوس.
تعلن محلات مخاميخ عن أحدث الأصناف:
شوربة الجواسيس !
----
المجد للمريشين.
***
مخاميخ صيفية: عدنان القماش.

هوجة يناير !

يا جماعة الخير روقوا دمكم بقى...الأمور مش مستاهله...كانت ساعة شر وراحت لحال سبيلها... !
اعتبروا إننا النهاردة قبل 25 يناير 2011...
الإخوان في السجون...والبوب على تويتر...والعسكر بلدهم رجعت لهم تاني.
وشباب الثورة رجعوا أقلية وعرفوا حدودهم.
واللي مات ربنا يرحمه ويصبر أهله.
واللي عرف يعمل قرشين من الثورة ربنا يسهله.

أنا شايف إننا نرجع بقى نتفرج على الكرة.
خصوصا بيقولوا إن فيه ماتش محوري جدا في تاريخ الكرة المصرية...ويمكن نوصل للمونديال.
وأهو تبقى فرصة نروح البرازيل ونهرب هناك...وندور على شغل ونعيش حياة جديدة.
هي مصر أزدهرت أقتصاديا غير عن طريق الشباب اللي هرب أيام كأس العالم في إيطاليا...واشتغلوا هناك...؟
شوفتوا إزاي الأمل في بكره عمره ما بيموت؟!

خلونا ننسى بقى الإيام الكئيبة بتاعت يناير دي !
خلونا نعرف نتقدم تاني ونرجع تصنيفنا في الفيفا.
يا جدعان أحنا كنا تقريبا ضمن أفضل عشر فرق في العالم.
شوفتوا كنا فينا وبقينا فين؟
يااااااااااااه الدنيا دي دوارة بصحيح...خسارة يا مصر خسارة !
----
المجد للفيفا !
***
مخاميخ صيفية: عدنان القماش.

تابعونا على صفحة مخاميخ !

https://www.facebook.com/Mkhamekh

عندما يساومونك على إنسانيتك !

عندما يساومونك على إنسانيتك !

بالأمس تم قتل 36 مواطنا مصريا موجهة إليهم اتهامات، وبما أن الاتهامات مازالت قيد التحقيق، فبالتالي هم مواطنون شرفاء أبرياء.

واليوم تم قتل 25 مواطنا مصريا، جنود بسطاء، تشع وجوههم ببراءة المصريين من ابناء الريف، لا جريرة لهم غير أنهم يؤدون الخدمة في الجيش للدفاع عن أرض الوطن.

يتم استغلال الحدث الثان، لينسونا الحدث الأول. 
ثم يتاجرون بالدماء لوأد إنسانيتك.
يسألونك: أين صوتك من مقتل جنودنا؟
حقا ! 
لم أرى جنونا أكثر من هذا. 
هل تسألني عن رأيي في مقتل إنسان برئ، نحسبه مرابطا في سبيل الله اثناء خدمته في الجيش.
تسألني، وكانت ثورتي في الأصل على إهانة الإنسان المصري في أي مكان، وأي من كان، حتى ولو كان مجرما في السجن.

ثم بالله عليك، 
هل سألت نفسك من المسئول عن دماء هؤلاء الجنود؟
هل تريدني أن ألطم الخدود وأشق الجيوب - بما يخالف هدي نبينا عليه الصلاة والسلام - لمقتل جنودنا؟ 
ولا تريد أن تسأل نفسك، لماذا ترك المسئولون أولادنا بدون تأمين ليذبحون؟

ألا ترى أن الضحايا يتساقطون من الجانبين ولا توجد نتائج لتحقيقات، ولا يقدم لنا متهمين بأدلة واضحة تقنعنا، وتشعرنا بأن العدالة ناجزة؟

من يقول بقتل إنسان، كل ذنبه أنه يريد أن يعبر عن رأيه ويرفض الظلم. ولو خرج عن القانون، عامله بالقانون. 
ولو حمل السلاح تعامل على قدر الفعل. 
لا تقتل وتجرح الآلاف.

من المسئول يا من تخاف على وطنك؟ 
أنا؟ 
لمجرد أني رفضت أن يذبح البعض بغير ذنب أو تهمة؟ 
أم المسئول الذي قال أنه سينقذ البلاد من مقتلة عظيمة، وها هو يقودنا لمقتلة أعظم؟
أليس المسئول، هو من ترك رجاله بلا حماية، يقتلون ويذبحون، وليست المرة الأولى؟
هل سمعت عن سجن أو إقالة أحد من المسئولين لتقصيره؟
أين من قتلوا جنودنا في رمضان قبل الماضي؟

هل يجب أن أضحي بكل المبادئ والأخلاق والرحمة والإنسانية...حتى يتم استكمال ذبح بشر بلا دليل أو تهمة.
وتسخر مني بقولك: بتوع "حكوك" الإنسان؟
وتكتبها هكذا بالكاف على سبيل السخرية من المطالبة بالحقوق والعدل !

رحماك يا الله...
أصبحنا فرقا وشيعا حتى في الدم...
ويكأن دماء الجيش والشرطة تخص المؤيدين للانقلاب، ودماء المتظاهرين تخص الرافضين للانقلاب؟
الدم كله حرام، الدم كله مصري، دم المجند البسيط، ودم المتظاهر البرئ.
ومسئولية حماية هذا وذاك، تقع على من في يده السلطة الآن.

وبالله عليك...
إن كان ما يحدث حاليا، ليس بداية حرب أهلية...فما هو تعريف هذه البداية؟
ما ترونه من بنايات مهدمة ودبابات مدمرة في سوريا أو ليبيا قبلها، 
هي صور من حرب أهلية اشتعلت بالفعل...وليست مشاهد لبداية هذه الحرب.
بداية الحرب كان الشباب يخرج في مظاهرات، وقوات الأمن تسحقهم بكل قسوة وعنف.
تقتلهم بلا رادع وبدم بارد، حتى انفجرت الحرب.

حسبنا الله ونعم الوكيل.
اللهم أني أبرأ إليك من كل دم سفك، وأبرأ إليك من كل قول وفعل كان سببا في سفك الدماء.

اللهم أخرجنا مما نحن فيه، ولا تؤاخذنا بما فعل السفهاء منا.
اللهم أحفظ مصر وأهلها من كل سوء وأرنا سبل الرشاد.
يا رب يا رحمن يا رحيم
----
المجد لأصحاب المبادئ
***
مخاميخ صيفية: عدنان القماش.

https://www.facebook.com/Mkhamekh

نظرة سريعة على خطاب السيسي

نظرة سريعة على خطاب السيسي

في البداية أحب أن أنوه أن السيسي خطير...نسخة عسكرية لديها القدرة على مداعبة مشاعر عموم المصريين، خصوصا المشاعر الدينية. 
ويتحدث دائما بأسلوب المصري الجدع ابن البلد... !
(ألف مبروك يا ولاد)

بعد تنحية العواطف عن الخطاب تجده خطابا أجوفا...لم يقدم شيئا.
لا حلول مقدمة، إصرار على الموقف، وتجاهل تام لحجم الحراك الثائر ضده على الأرض.
حاول أن يحصر هذا الحراك في فكرة أنه حراك لتيار لا يريد الاستقرار، ويريد هدم الدولة.

حاول أن يظهر بدور حمامة السلام، ولكن الإخوان هم من أضاعوا الفرصة تلو الأخرى.
وأن الإخوان كانوا طائفة يجب التخلص منها، لحماية مصر وشعبها الذي يستحق الحماية والحب والحنان.

أعاد التأكيد على زهده في الحكم، وأننا لا نحيا في ظل حكم عسكري، وأن ما يحدث هو لحماية مصر، واستعادة الشعب لحريته في اختيار من سيحكمه.

لم يحاول كسب قطاعات جديدة، أو استمالة الثائرين حاليا.
بتأكيده على أنه لا خروج عن خارطة الطريق.

وبما أنه يداعب الشريحة التي مهدها له الإعلام...خصوصا الشريحة العكاشية.
كان يكثر من القسم، بما يتناسب مع طبيعة هؤلاء البسطاء.
(ومن كتر الأيمانات...حسيت إنه خلاص هيحلف بالطلاق...
"عليه الطلبات بالتلاته ما حصل غير الكلام اللي بقولك عليه ده يا أبو سوسو")

مع الحديث عن الإسلام والأزهر، وأن الدين ليس حكرا على أحد.
وأنه وعامة الشعب يفهمون دينهم تماما، وربما أكثر من هذا التيار الذي كان يحكم البلاد، هذا التيار الذي يظن أنه يحتكر الحقيقة وحده.
وفي بداية خطابه، ضرب عدة أمثلة دينية، ولو استمر في هذا السياق، لتحول الخطاب إلى خطبة الجمعة.

اشعر كذلك، أنه لو لم يكن هناك عمليات تخريبية ضد بعض الكنائس، وبعض أقسام الشرطة، ما كان ليجد ما يدافع به عن موقفه غير القسم باليمين.
ولم يكن ليفعل غير إعادة اجترار قصة الحرب الأهلية التي أنقذ منها مصر.
(وكأن مصر الآن في طريقها إلى مارينا !)

تأكيده على الرغبة في الاستمرار في العمل وزيادة الجهد والانتاج، وأن يتخطى الشعب هذه المرحلة.
أرى أنه يريد أن يطوى الصفحة، ويستمر في مسلسل تجاهل المظاهرات وردود الفعل الموجودة على الأرض.
وكذلك لكون عدم الاستمرار في الانتاج، يمثل ضغطا شديدا على الدولة.
(وطبعا سيادته مش عارف، إن الشعب المصري في معظمه، نفسه الوضع يفضل زي ما هو...علشان الأنتخة تستمر)

لم يأت على سيرة المجازر، أو يتحدث عن عدد القتلى، ولم يأت على سيرة لجان التحقيق.
فقط القوة والرد القاسي على من يريد أن يهدم الدولة، بل قالها بمنتهى الصراحة في نهاية الخطاب:
"إيدينا ممدوة بكل الخير لكل المصريين
واللي مش عايز خير...هنواجه الكلام ده بكل القوة وكل "العنف" !
ليه؟...علشان نحمي مصر...دولة مصر...!"
(طبعا تلاقي الناس المؤيدة للانقلاب خصوصا شريحة القهاوي، قاموا يصرخوا: "طلع عين أبوهم يا ريس")

وكذلك لم يأت على ذكر الكلام الدائر عن تدخلات الكيان الصهيوني في سيناء، أو عمليات مشتركة أو تعاون...مثل حادثة الطائرة بدون طيار.
ولم يهتم كثيرا بردود الأفعال التي تدينه مثل استقالة دكتور البرادعي.
لم يلمح حتى لهذه الاستقالة، ولم يعرضها على أنها خيانة للوطن في هذه المرحلة.
(طبعا هو مستكفي بالنفخ اللي اتنفخه البرادعي من الإعلام...الضرب في الميت حرام).
لكن التجاهل هو موقف من يريد أن يظهر بمظهر القوي الذي لا يهتز، ولا يفرق معه رحيل أو بقاء أيا من كان.
(إحنا قافلين الفايبريشن يا بشرية...وما فيش حاجة تقدر تهزنا ولا مؤاخذة)

أحضر معه اللواء العصار ليقتل الشائعات عن الانشقاقات.
(أجري ياض أنت وهو...مين ده اللي ينشق...اللي ينشق...نشقه نصين)

قام قبل نهاية الخطاب بتوجيه الشكر والعرفان للدول الخمس التي وقفت إلى جوار الانقلاب.
وحقا رأيته موقفا كوميديا لا يليق بقيادات جيش دولة بحجم مصر.
(أقرب لأسلوب الأفراح الشعبية "وتحية لأبو سامية...أبو سامية...وكمان حودة الجن...وتحية كبيرة قوي لعم الحاج عوضين...صقفوا لهم")

لكن يبقى الخطاب موجها لشريحة بعينها، ولا يريد أن يكسب تعاطفا جديدا.
----
المجد للعكاشية.
***
مخاميخ صيفية: عدنان القماش.

https://www.facebook.com/Mkhamekh

عش ذليلا أو حطم سفينتك

شكرا لمن سأل عني، أنا أمر بوعكة صحية شديدة منذ نهاية العيد.
ومع عدم تواجد الأسرة لانقطاع الطرق، ساءت الحالة قليلا وتأخر الشفاء. لكن أنا في تحسن حاليا والحمد لله على كل حال.

في الحقيقة، أنا في حالة صدمة شديدة.
لا أعلم ماذا أقول في هذه الأحداث المجنونة؟
كتبت كثيرا من قبل، وصرخت كثيرا، ولكن كان كل هذا هباء.
كتبت أن المنافسة بين السياسيين يجب أن تكون على الأرض وبين جموع الناس، وان تكون منافسة لخدمة المجتمع، لا لتقسيمه.
كتبت أن شباب الثورة يجب أن يتحدوا في تجمعات سياسية تخدمهم، وإلا سيكونوا دائما كالدمى التي يحركها كل طرف لصالحه.
كتبت أن الحشود أمام الحشود...لن تؤدي إلا إلى أمرين:
إما شلل البلاد، أو حرب أهلية.
لكن صدق الشاعر:
لقد أسمعت لو ناديت حيا *** ولكن لا حياة لمن تنادي

في الحقيقة لم أتخيل أن هذا سيكون رد فعل جيشنا، أعلم أن هناك أفعالا كثيرة كانت إشارات لما نراه الآن.
ومنها المذابح الصغيرة التي كانت تمهد للمذابح الكبيرة.
لكن كنت أكذب نفسي، ولم أتخيل أن يصل الأمر إلى هذا الحد.
نحن أمام أمرين أسوء من بعضهما، يتم فرضهما:
إما أن تنكسر إرادة طائفة عريضة من الشعب؟ أو تنكسر الدولة؟
سيناريو السيء والأسوء الذي نعيشه من أول الثورة.
عش ذليلا وأرضخ، أو حطم سفينتك.

نحن بصدد محاولة مستميته لدفع البلاد إلى مذابح كثيرة لكسر الإرادة أو تحطيم الدولة، وأرى أن هذا سيجرنا إلى سيناريو سوريا أو الجزائر لا قدر الله.
ولا تحلموا كثيرا باستقلال عن طريق محاربة بعضنا البعض، فمصر أكبر من أن يتركها العدو لحالها مثل سوريا أو الجزائر. ما أن يقضي أحد الأطراف على الآخر، سينقض العدو ليقتنص الوطن الذي تفتت.

لا تحدثوني عن العقل ولا تحدثوني عن التعايش...اللذين أتمناهما.
فهناك مشكلة كبيرة وشرخ عظيم في السلامة النفسية للمجتمع،
وغالبها ناتج عن الإعلام المحرض وعمليات غسل المخ، بالإضافة إلى اضمحلال مستوى الثقافة والوعي - بصرف النظر عن المستوى التعليمي - :
وما ترونه من قصة "طفاية الحريق" التي جعلت البعض ينسى كل ما حدث من أول 25 يناير حتى يومنا هذا.
وسواء هو خطأ في الوصف من أناس محاصرين، أو حتى لو اعتبرتها كذبة. سمها ما تشاء...لكن هذا لا يلغي كل الجثث وكل المصابين وكل حالات الحبس والسحل والقهر؟
ولا يلغي في الأساس كون هؤلاء الناس محاصرين !

أصبح بيننا من يصدقون ما يقال لهم، مهما كان مستواهم التعليمي.
فبالله عليكم، أين هي الأسلحة المكدسة في رابعة؟ أليست هي من الأسباب الرئيسية لفض اعتصام رابعة؟
ثم ما هو مصير كل الشائعات السابقة عن بيع القناة وأبي الهول وغيرهم؟
ولماذا قامت الدنيا ولم تقعد عندما اشيع أنه سيتم بيع امتياز القناة لدولة قطر، ولم نسمع كلمة عن بيع امتياز القناة لدولة الإمارات؟
وكيف أن السعودية الدولة التي تدعم الفكر الوهابي التكفيري - كما يدعي البعض -، تصبح الدولة المؤمنة المحبة لمصر وأهلها، وتبحث عن سلامتنا؟
من الذي يعترض على دستور كتبته لجنة منتخبة من قبل مجلس الشعب المنتخب...ويصفه بالدستور الإخواني المسلوق؟
ثم بعد هذا يرضى بدستور يٌكتب في مدة أقل، من قبل أشخاص لم ينتخبهم أحد، ولا يمثلون كل شرائح الشعب المصري؟
بل دعك عنك هذا.
أين اسماء المسئولين أو اسم الجهة التي قتلت جنودنا في شهر رمضان قبل الماضي؟
ألم ننتهى من حكم الإخوان الغاشم، وأصبحت مقاليد الأمور في يد من لا يتستر على الإرهاب؟ أين المسئول عن قتل جنودنا؟

بل دعنا نسأل عن الأحدث:
أين هي لجنة تقصى حقائق مذبحة الحرس الجمهوري والنصب التذكاري؟
وهل سنجد لجان تقصى حقائق لفض اعتصامي رابعة أو النهضة؟ أم هي أحداث قامت بها الملائكة ولا يجب مراجعتهم؟

من يقول أن الجيش والشرطة يقتلان العزل، بحجة ان هناك من يحمل السلاح.
لو كان هناك من يحمل السلاح بين المتظاهرين، فلتقتنصه، ويكون القنص بهدف الإعاقة وليس القتل.

ولو تكلمنا عن حمل السلاح كجريمة.
فمن هؤلاء المدنيين الذين يحملون السلاح ويقفون مع الجيش والشرطة؟
والصور والفيديوهات أكثر من أن تحصى.
المبدأ لا يتجزأ...من يحمل السلاح خارج الأجهزة التنفيذية، فهو مجرم.

لكن لا تحير نفسك سيدي وتبحث عن إجابات.
فالواقع يقول، أن هناك من يكره نفسه ويكره كل من حوله، وسيبرر قتلك ولو كنت أقرب الناس إليه.
وهناك من يريد أن يظهر بدور البطل صاحب القلب الكبير والعقل الرشيد الذي يعشق وطنه، حتى ولو ضحى بحريته. ويزداد هذا الحماس بين حاشيته من المؤيدين على المقاهي أو الفيسبوك.
هو يرى ويعلم الظالم من المظلوم، لكنه لا يريد إلا ما تشتهيه نفسه.
ولماذا نُخرج أفراد الجيش والشرطة من هذه الحالة؟ ما الذي يعصمهم من هذا الجنون؟

وهناك طبقة أسوء، خلقتهم حالة الكراهية الحقيقية التي تحرق المجتمع، بالإضافة للفقر والجهل:
أناس بسطاء مغيبون، ليسوا كلهم ببلطجية، يقتلون على الهوية.
لا تفرح اليوم إن كانوا يقتلون من يخالفك في الرأي، فغدا سيقتلونك، عندما يقوم الإعلام المغرض بوصفك بالإرهابي الذي يهدد أمن الوطن.

ولماذا تلوم نفسك على ضبابية الرؤية؟
إذا رأيت صفحة أحد من نحتسبهم عند الله من شهداء ثورة يناير.
وتجد أحد القائمين على الصفحة، قد وضع صورة لضابط شرطة يركض بين الغاز حاملا بندقيته، ومكتوب على الصورة وعيدا للإرهابيين !!!
ملاحظة: أستنكر المديرون الأخرون للصفحة هذا الفعل.

حقا لا أعلم ما هو الحل.
"لَيْسَ لَهَا مِنْ دُونِ اللَّهِ كَاشِفَةٌ"

اللهم أحفظ مصر واهلها من كل سوء.
اللهم لا تؤاخذنا بما فعل السفهاء منا.
اللهم أخرجنا من كربنا هذا يا الله، أنت ولي ذلك والقادر عليه.
حسبنا الله ونعم الوكيل.
----
المجد للمجانين.
***
مخاميخ صيفية: عدنان القماش.

تابعونا على صفحة مخاميخ:
https://www.facebook.com/Mkhamekh

موسم الرحمة والغفران

اللهم أني أشهدك أني قد سامحت كل من أخطأ في حقي أو أساء إلي.
فأغفر لي وأعفو عني يا رب العالمين.

اللهم تقبل صيامنا وقيامنا...اللهم أرزقنا ليلة القدر.
اللهم أغفر لي ولوالدي ولجميع المسلمين.
اللهم أرزقنا الهداية، نحن وعبادك أجمعين.

اللهم أخرج مصر مما هي فيه...وأحفظها وأهلها من كل سوء.
اللهم أرشدنا سبل الرشاد بفضلك وكرمك ورحمتك يا أرحم الراحمين.

هذا موسم الرحمة والغفران والتوبة والتسامح...فأغتنموه.
وصل اللهم على سيدنا محمد وآله وصحبه وسلم.
***
أخوكم في الله عدنان القماش.

الخطة ناصر 2013

سيداتي أنساتي سادتي...
دلوقتي حضرتك سموك الموقف أختلف تماما... !
اللي كان قاعد يمين جيه شمال...واللي قاعد شمال اتزحلق في الحمام...والبلد بقت أخر زروطه...

دلوقتي العسكر مش قادرين يفهموا إيه اللي حصل...ومش عارفين هي ثورة يونيو فين؟
وعمالين يقروا الخطة اللي حطوها...ولحد دلوقتي مش عارفين المشكلة؟
لحد ما زهقوا...وجابوا خبير استراتيجي من بلاد بره...يقرا الخطة.

"الخطة ناصر 2013:
هنعلن الانقلاب...نقبض على شوية قيادات من التيار الإسلامي....نرجع البنزيم...ونقفل كام قناة......نبطل نقطع النور.
سيادة الفريق يطلع على التلفزيون وهو بيصلي...وبعدين يقول إنه زاهد في الحكم...ويقول أحنا بنخاف ربنا...
فالناس تصقف...وتتلم الليلة !"

الخبير الاستراتيجي...يبص للي حواليه وعينيه مليانه دموع:
تراني تأثرت...!
بس هي خطة زي الفل...إيه المشكلة يا رجالة؟ إيه المشكلة؟

الرتب قعدت تراجع الأخطاء وعمالين يوجهوا أسئلة لبعض:
يمكن علشان حكومة شباب 19؟
يمكن علشان خاطر آشتون حلقت للبرادعي اللي ما عندهوش شعر أصلا، والمصيبة أنه كان لسه فاضل شوية على العيد؟
هل يمكن علشان كل اللي استشهد بهم سيادة الفريق نفوا كلامه؟
يمكن الناس اتخنقت من رصانة وهدوء سيادة الرئيس المؤقت؟

الخبير الاستراتيجي، بص لهم باندهاش وقال:
يمكن...بس مش عارف بصراحة يا رجالة !
ده أنا كمان شايف إنكم معتمدين على وسامة سيادة الفريق، اللي هو أوسم من عبد الناصر في شبابه.
وكمان الرجل أخر شياكة...مع انتشار شائعات إن كبرى بيوت الأزياء بدأت تهتم بموضة البنطلون تحت الحجاب الحاجز دي.

لكن الخطة زي الفل...والظروف خدمتكم طحن
ده كفاية الخطاب الممل اللي قعد أكتر من ساعتين...من طرف الرئيس المنتخب... اللي جاب شلل للجميع...المؤيد قبل المعارض...

الخطة ما فيش فيها الهوا...دي مفروض تمشي زي الزبدة في الكحك...بس ما تنسونيش في اتنين كيلو باللوز...ومن قدم كحك بيداه التقاه...وهنيالك يا معدل المسار بالانقلاب !

فجأة دخل المتحدث الرسمي بيبكي ويصرخ:
مصيبة كارثة...دي مؤامرة...دي مؤامرة..!
أنا ما نجحتش في اختبار أراب أيدول !!!

بص الخبير الاستراتيجي على المتحدث... وبعدين بص على سيادة الفريق...!
مال الخبير على الرتبة اللي جنبه وقاله:
هو ده اللي بوظ الليلة وأكل الجو يا معلمي !
----
المجد للسلطانية
***
مخاميخ صيفية: عدنان القماش.

ما بعد الإنقلاب...في السريع كده

في السريع كده
حضرتك لو قاعد في مدرجات حزب الكنبة الثورية، هتشوف كل حاجة...وما تسألنيش إزاي والقنوات مش بتذيع حاجة !

لو حضرتك بتبص على رابعة على يمين الشاشة، هتشوف إن الموقف تعدى مرسي إلى حرب من أجل الوجود.
الإخوان بيدافعوا عن وجودهم لإنهم...لو سابوا الميدان هيتم دبحهم...

أما بقى لو حضرتك ببتص على التلفزيون من ورا...هتشوف تراب...!
قصدي هتلاقي فيه ناس كتير رافضة الإنقلاب وأنضمت للإخوان...
وفيه ناس تانية أتضح لهم إن الإنقلاب طلع إنقلاب...
أي والله الإنقلاب ما طلعش فوق ياكل عند أمه...والناس دي بتزيد مع الوقت.
خصوصا مع الفشل في تشكيل وزارة رفع الأثقال، الشباب اللي شرفنا في أوليمبيات بدايات القرن العشرين...وعرفنا إن تمكين الشباب بيبدأ بعد السبعين !
بالإضافة للإعلان الفسفوري الجميل...والرئيس الطرطور.
ومع الدم اللي بيسيل...وعودة الداخلية بكل روعتها المعتادة.
ولو تحب تضيف للموقف نكهة القهر وتخلي وش الصينية يحمر...تقدر تضيف رشة صغيرة من حالة الطواريء.
وبعدين ترمي الصينية بالخارطة بتاعتها في الزبالة وتشتري جاهز أحسن.

لكن لو حضرتك بقى قاعد في الحمام لا مؤاخذة...إحم إحم !
هتلاقي العسكر بيتفرجوا على فيلم...لا تراجع ولا استسلام.
وشكلهم دخلوا في ليلة ما كنوش فاكرينها كده خالص...
شكلهم فاكرين الموضوع زي فان دام..
هينفخ عضلاته ويضرب الواد ضربتين.
يقوم المخرج ميت من الخضة...
وتخرج من السيما من غير ما تحاسب على الفيشار...
حد بقى يقولي: يعني هم هيعملوا العملة دي وما يبقوش متوقعين النتائج دي؟
أقوله: لا لا أبسلوتلك...دي مصر يا فندم...دي مصر .
يعني ما تفترضش أي ذكاء في أي طرف..إلا من رحم ربي.
أي والله...أنا هتجنن أصلا...ياااااااختي.
ما كانوا يقدروا يطيروا مرسي باستفتاء يا أختي !
وكل الناس مش طايقه مرسي أصلا يا أختي !
وكمان كانوا يقدروا يصبروا يومين على أزمة الكهرباء والبنزين وغيره.
لكن ما شفوهمش وهم بيسرقوا..شافوهم وهم بيتحاسبوا.
يا اللي موتي ونفسك في بوق بنزيم يا ختي !

أما بقى لو حضرتك قاعد في البلكونة مرحرح كده، ولابس الحتة القطونيل الصعيدي.
وهتكلمني على الذكاء وأنت بتضرب حلبسه وحتة كنافة...وهات حتة يا كابتشن !
هقولك: هو يعني فيه أكتر من ذكاء الإخوان هم كمان.
قال المتحدث الرسمي السابق ياسر علي يقولك: 
بعد البيان الأولاني، كنا بنصلي ورا مرسي، أنا والسيسي.
وبقول للسيسي ليه البيان ده؟ كده هيبقى شكلنا، كأننا مش متفقين؟
السيسي يقوله: أوعى تديهم الفرصة يظهرونا كأننا مش متفقين !
آحبيبي آعيني ...يا مسهر عيني !

الغباء سيد الموقف...والموقف سيد الغباء...
ودلوقتي الكورة مع الليبراليين...والليبراليين مع الكورة...ودي طبعا خلوة مش شرعية !
وطبعا لما نقول الليبراليين ، يعني نقوم نقول سلام مربع لكبير المنطقة...
يعني نقول نجم الانفرادات...ورجل التويتات الصعبة...يعني كبير شبكات التواصل الاجتماعي.
يعني نقول امسك انفراد وتسلل مع البوب !
وطبعا فيه ناس تموت في تخوين البرادعي...لكن بصرف النظر عن التخوين من عدمه...
حضرتك سيادتك، 
هتلاقي البرادعي شايل الليلة ..
لأنه بيمثل لناس كتير إنه ضمير الثورة، والثورة ضمير إنه !
وكانت مواقفة بتمثل دور الفارس النبيل اللي رفض يتمرمغ في وحل بيادة العسكر...
لكن هو دلوقتي لابس في الحيطة...ولن ينفعه أي تويته ولا حتى إس إم إس...من أم فلوس .
وأحنا قولنا كده...هيحرقوا الجميع...بس ما حدش بيسمع...
ورأيي المتواضع إن البرادعي دوره تجميل وجه الانقلاب في الخارج...
يعني البرادعي تحول من ضمير الثورة إلى كوافير العسكر !

وفي جميع الأحوال أنا شايف إننا داخلين في حيطة...يعني داخلين في حيطة.
وسمعني ذئاب الجبل يا عم...ديب ورا ديب ورا ديب.

يا عم دوس الفرامل...أبوس إيد أهلك...شد فرامل اليد حتى.
- أنت بتفهم في البيجو؟
- لا، ليه؟
- لو بتفهم في البيجو، تعالى وقفها !

ولو سألتك أنت مصري تقولي إيه؟
قولي، بيت أم اليوم اللي شوفتكم فيه...!
ونقولك تستاهل...إيه اللي وداك هناك؟
آحبيبتي آمصر آمصر...
----
المجد للحلبسه. 
واشوفكم في السرايا الصفرا...
والسلام عليكم ورحمة الله وبركاته
***
مخاميخ صيفية: عدنان القماش.

تابعونا على الفيسبوك صفحة مخاميخ
http://www.facebook.com/Mkhamekh