الخميس، 2 أكتوبر 2014

طشة الملوخية في الوصول للسعادة الزوجية


زهقت من زوجتك...نفسك تجدد حياتك !
أنسف...
أنسف همومك يا عم...مش زوجتك.

طب زهقتي من بعلك...نفسك تنطلقي في الحياة.
الرجل كاتم على نفسك يا ختشي...تعالي معانا في رحلتنا النهاردة.

خليني بس اسألكم السؤال ده 
وفكروا فيه على أما نوصل لنهاية المقال ده

أحنا بنتجوز ليه؟

بص يا سيدي.
عمرك سألت نفسك هو أنت ليه بتبقى سعيد مع أصحابك؟
ليه بتضحك من قلبك في الكافية؟
لكن في البيت بتبقى عامل فيها طائر الأيبس المتحنط؟

طب بقولك يا أستاذة؟
عمرك سألتي نفسك...ليه صاحبتك شاهيناز...أطيب وأرق من زوجك؟

القصة وما فيها إننا مش عارفين أحنا متجوزين ليه...زمبئلوكم كده.

يعني أقولك.
أنت صاحبك لوكو مثلا...ليه بتحبه قوي كده؟
علشان أنت مختارة على الفرازة...وعدى عليكم وقت طويل من الخبرات والمرجلة والمجدعة...ياما أضربنا مع بعض يا معلمي.
وياما دارا عليك في مواقف منيلة.
يعني هو الوحيد اللي بتتكلم معه وأنت مش خايف يفضحك ولا يعايرك ولا يقول عليك عبيط.
علطول هيقولك: ياخود عدوينك يا صاحبي.

سامعة يا ناريمان لوكو بيقول إيه وبيعمل إيه؟

طب خليني أسألكم كمان سؤال.
عمر مديرك يبقى صاحبك؟
بلاش كذب...هو فيه مدير يتصاحب...!

لا بجد.
ليه مديرك بيبقى أخر واحد في الشركة ممكن تصاحبه؟
أقولك أنا...علشان فيه بينكم حاجز...فيه بينكم وشوش خشب.
مع إن مديرك ده...في نفس الكافية في الترابيزة اللي وراك...قاعد مع أصحابه مسخسخ من الضحك وأخر فرفشة؟
طب أركن أنت شوية.

وصلنا لإيه يا ناريمان؟
برافو عليكي...لوكو صديق وفي وطيب...أمين...بيفدي صاحبه برقابته...ومحل أسراره...وعمره ما بيسخر منه !
طب والمدير؟
واحد حاطط حواجز ومخشب...رغم إنه إنسان طبيعي زينا.

طب إيه الحل؟
ما فيش حل خلاص...لازم تتطلقوا.
لا يا جدعان تعالوا...أنتوا ما صدقتم...أنا بهزر.

طيب يا جماعة هو أحنا بنتجوز علشان الجنس.
جزء مهم في العلاقة أكيد...بس مش هو العلاقة.
مفروض إنه وسيلة تزود الاتصال بين الأرواح.

طب بنتجوز علشان الأولاد.
من نعم ربنا طبعا...لكن إيه فائدة وجودهم لو خليتم عيشيتهم طين بالعلاقة البايظة اللي بينكم؟

طب أنتي متجوزة علشان تتفسحي يا ناريمان يا أختشي.
وتشتري لبس وتلطعي الرجل بالعشر ساعات على أما تلفي كل المحلات
وفي الأخر ما بتشتريش حاجة...ولو اشتريتي...تاني يوم تروحي ترجعيهم.

طب بنتجوز ليه؟
أقولكم أنا
بنتجوز علشان يبقى فيه بينا بعض مودة ورحمة.
يبقى فيه أرواح عايشة مع بعض في جنة أرضية.
عصفورين لهم عشهم الخاص...وسرهم الخاص.
لهم منطقتهم اللي ما بيدخلهاش غيرهم.
مش ناظر وطالب...مش مدير وموظف...مش ست هانم وسواق...مش أمير وجارية.

يعني الزوجة للزوج..والزوج للزوجة.
أكتر من صحوبية لوكو لصاحبه.
وأوعو حد يقرب من مستوي المدير الرخم السمج أبو وش خشب.

لازم تعرفوا إن إطلاق النار متبادل.
لا زوجك لسانه قصير...ولا زوجتك بوزها قصير.
يا عم أسكت.
دي تديلك بوز واحد بس....تقلب عليك عيشتك عشر سنين.

يعني يا جماعة...أنتم لازم تكونوا أصحاب.
طب ليه صاحبك لما بيقول نكته بتضحك....رغم أن النكتة ممكن تكون بايخة ؟!
فيه اختراع اسمه مجاملات...أي والله.

طب صاحبك لو رخم عليك
وقلبك مرة واتنين
مش بتفوت وتسامح؟
عارف ليه؟
علشان له عندك رصيد وكمان بتحبه بجد...مش عايز تخسره يعني !

طب يا ناريمان...مش صاحبتك شاهيناز بتغلط
مش ساعات بتبقى عصبية...مش ساعات بتبقى رخمة وبايخة.
وبتعيط بدون سبب زي المجانين؟
شاهيناز ما بتعملش ده كله؟
دي تبقى رجل وأنتي مش واخدة بالك يا ناريمان 

لا بجد...أنتي لسه مصاحبها ليه؟
عارفة ليه؟
علشان أنت عارفة إنها بشر يا ناريمان
مش فارس أحلام...راكب حصانه الأبيض في أبيض.
والكلام اللي لحسوا دماغنا به.

فيه بينكم عيش وملح
وما فيش حد كامل يا ناريمان...وحبك لها...بيفلتر عيوبها.
علشان كان بينكم أيام بريئة مش مبنية على مصلحة.
كنتم بترجعوا من المدرسة إيديكم في إيد بعض.
وما فيش حد فيكم عايز حاجة من التاني.
طبعا ما يمنعش أنها كانت بتسرق سندوتشاتك.

طب مش كنتم بتقعدوا ممددين وباصين للسقف
وتحلموا بأحلام مشتركة.
عمرك بوزتي لشاهيناز...وقولتي لها عايزه أروح أصيف في بلطيم.
لا طبعا.
دائما بتقترحي وأنت بتتنططي زي الطفلة الصغيرة.
ممكن نروح بلطيم يا شاهي...؟
ألا حد يقعد يحلم علشان يروح بلطيم؟!

طب الوالد...مش أحسن حد في الدنيا؟
طب أحب أعملك مفاجأة.
الوالد مش لوحده أحسن حد في الدنيا...كل البهبهات كده لأولادهم...خصوصا عند البنات.

أهو زوجك لما بيبقى مع صاحبه لوكو...بيبقى حاسس إنه أحسن واحد في الدنيا.
لوكو بيعامله على أنه أفضل إنسان في الدنيا...وفي غيابه هيقول...صاحبي أفضل صاحب في الدنيا !
فيه بينهم عالم مشترك...عالم بتاعهم هم الاتنين بس !

عرفتوا بتتجوزوا بعض ليه؟
علشان بتحبوا بعض...علشان تشيلوا بعض...علشان تبقوا ضهر لبعض...علشان ما ينفعش تعيشوا من غير بعض !

هتقولوا لي نعمل إيه؟
بعد ده كله ولسه أقولكم تعملوا إيه؟

خلوني أقولكم المثل العظيم ده...ودي قاعدة عامة في مخاميخ:
لا تعطيني بيضة...ولكن علمني كيف أبيض ؟!

لا صحيح...اشتغلوا على العلاقة.
أعرفوا السكة للطرف التاني.
وأعرفوا إن الطريق رايح جاي...ما ينفعش الطريق يبقى في اتجاه واحد.

عارفين أهم حاجة تتعمل إيه؟
التسامح مع قليل من التطنيش.
مش قدماء المصريين قالوا...طنش تعيش تاكل قراقيش ؟!
طنشوا شوية يا جماعة...أنتوا مش بتربوا بعض من تاني.

والأهم
المصارحة والكلام بهدوء.
أعملوا ساعة كل أسبوع للكلام والمصارحة.
مش للتسبيل والتنهيد.
كل واحد يطلع اللي جواه ويحكي للتاني عن اللي مضايقه.
ما يفضلش كل واحد كاتم جواه ويروح ينفجر في وش التاني.

ويا ريت الساعة دي تبقى في مطعم جميل.
هو صحيح الرجل هيطلع بيلطم من الفاتورة...بس الأفضل تجتمعوا بره البيت.

ويا سلام بقى لو الطلعة من غير العيال.
سيبوا العيال عند نانا وجدو.

كلموا بعض يا جدعان.
عبروا عن اللي جواكم بهدوووووووووء وبحب.

ما تسيبوش المشاكل تكبر.
خلوا هدفكم الاستمرار والدفاع عن الكيان ده.

الستات بيحبوا الورد...هاتلها ورد يا سيدي
إيه؟ بتطبخ الورد؟
معلهش ...بكره تعرف إنه بيتشم !

يا عم قولها شعر...مش عارف...اقتبس:
الحب الحب...بلوبيف بلوبيف...من أخوكي اللمبي.

الكلمة الطيبة صدقة
يا سيدي حسسها إنها جميلة...يا عم حسسها إنها بتوحشك.
الست لو اتنططت قصادها وعملت قرد...بس ما نطقتش
مش هتعتبر أي حاجة حصلت.
أنطق واتكلم.
أعترف الإنكار مش هيفيد.

طب خود الوصفة دي:
قبل ما تفتح باب البيت...غمض عينك...خود نفس وسمي الله.
فتح عينك...أدخل البيت وقول السلام عليكم.
أول ما تشوفها...خودها بالحضن...وقولها وحشتيني قوي يا روحي.
صدقني هتاكل غدوة....عمرك ما كلتها قبل كده...جرب بس !

والغالي عندك يا ناريمان
أول ما يقولك وحشتيني يا حبيبتي...بلاش تقولي له:
الأنبوبة فاضية يا حبيبي.
قولي له:
وأنت كمان وحشتني يا حبيبي.
وبعد ما يغير هدومه ويلقط نفسه.
خوشي عليه بكسوف وقولي له:
عندي حاجة عايزه أقولها لك يا حبيبي بس خايفه أضايقك.
هتلاقيه طائر وبيقولك: قولي يا حياتي.
قولي له: الأنبوبة
واسكتي بقى.
أوعي تقولي فاضية...خليها تيجي منه.
اسمعي كلامي بس.

يا ستي حسسي جوزك إنه أفضل إنسان في الدنيا.
لما تبقوا في البيت...أقعدي جنبه من غير ما تتكلمي.
حسسيه بس إنك عايزه تبقى جنبه.
ولما تحسي إنه زهقان واسيه.
طب قرفان ومتعفرت...سيبيه شوية وهو هيهدى.
ما هو مش أنتي والمدير عليه يا ناريمان.

لما طرف يتكلم...الطرف التاني يسمع.
ما يخرجش عن السياق...غير لما اللي بدأ الكلام يخلص.
يقول على مشاكله...تفاعل معه.
مش واحد بيتكلم في ماتش الزمالك اللي نكد عليه.
والطرف التاني يتكلم عن جزر المالديف.

وكمان لو زعلتوا وجيه يصالحك
وجاب ورد..شيكولاته...حاجة ساقعة حجم الصاروخ.
بلاش تديلوا في جنابه.
عمره ما هيقدر يعمل الحركة دي تاني.
كل ما هيشوف الورد هيحس إنه ساذج وعبيط.
وهيروح يجيب سندوتشين بثمن الورد.

أهم حاجة...والغالي عندك.
بلاش تستني يحصل زي أغاني الفيديو كليب.
مش هتصحي من النوم أصلك تلاقيه ماسك جيتار وحاطط في وردك شعرة...قصدي حاطط في شعرك وردة.

الرجل شقيان وكرشه مش هيساعده يمسك الجيتار.
أنا بحاول أخليه يخس في المقال اللي فات.
وغالبا المقال اللي جاي عن التدخين.
هظبطهولك.
أتقلي معايا بس يا ناريمان.
خلينا ننجح يا أختشي...قطيعة ما حدش بياكولها بالساهل !

فكروا يا جماعة واشتغلوا على العلاقة شوية.
وأهم حاجة خلونا نحتفظ بأدميتنا.

واسمع كلام الأجانب.
زوجة سعيدة = حياة سعيدة.
هم بيتجوزوا أصلا ولاد الكذابة؟!
واللي بيتجوز فيهم بيبقى شاف أشكال وألوان
ولما اتهد وعايز يعيش بقى...يقعد يتفلسف على أهلنا.

بس معلهش عديها ونفذ أنت.
خود الحكمة من الكلام.

والأهم خلونا نسعى لتحقيق الآية دي:

وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا
لِتَسْكُنُوا إِلَيْهَا
وَجَعَلَ بَيْنَكُمْ مَوَدَّةً وَرَحْمَةً ۚ
إِنَّ فِي ذَٰلِكَ لَآيَاتٍ لِقَوْمٍ يَتَفَكَّرُونَ

من أنفسكم يا جدعان...كان يقدر يخلقهم من غير ما يكونوا منكم !

وأخيرا
إيه رأيكم نجوز لوكو لشاهيناز؟
علشان الاتنين يقعدوا يدعوا علينا !


تابعونا على الفيسبوك - صفحة مخاميخ

الجمعة، 26 سبتمبر 2014

رئة مدخن ورئة غير مدخن

رئة مدخن ورئة غير مدخن

الأحد، 21 سبتمبر 2014

الدايت الطازة...!



طيب يا جماعة أنا قررت أساهم في إقرار السلام في العالم كله.

وهقولكم برنامجي الغذائي اللي هيحولك من أسد عجوز شرس وبكرش...إلى غزال شاب رشيق ووديع.

وطبعا لازم تراجعوا الطبيب علشان تتأكدوا إنه ينفعكم. 

من المفروض الوجبات عددها يزيد وكمياتها تقل...
يعني خمسة أو ستة بدل ثلاثة...
بس كل واجبة أصغر في الحجم.

والأهم من ده كله هو
الحركة والرياضة...
وما فيش اي أكل بعد المغرب...
ولو جوعت قوي بالليل...أديها جزرتين ثلاثة من اللي كوكي وميمي بيسموه بيبي جزر...
اللي هو لا يغني ولا يسمن من جوع ده...أيون...الجزر الكبير بيزهق أصله...

الفكرة كلها عبارة عن شوية سعرات الجسم محتاجها...ولو أخد أكتر منها...وما عرفش يحرقها...هيحولها لسيادتك رصيد...والرصيد ده عبارة عن دهون.
عايزك بقى تجيب عدسة مكبرة وتقعد تشوف كل عبوة فيها سعرات حرارية أد إيه...؟
قفشتك يا مجرم...سعر برئ ماشي في حاله...تاكله ليه؟!

من الفنيات:
استبدال اللبن كامل الدسم...باللبن المنزوع الدسم...أو لبن اللوز.
الموز والجزر والخس والسلطة دول رفقاء السلاح من أول لحظة تخسيس.

من الأسرار الفنية العظيمة:
الفاصوليا السوداء...لو ما لقتش خوش على الفاصوليا البيضا.
طبعا تتاكل مسلوقة مش مطبوخة...وممكن تعصر عليها شوية ليمون وتديها شوية بهارات في اللذيذ.
وأنا ساعات بحط عليه سنة زيت زيتون وسنة خل.
وجبة هتشبعك وسعراتها مش عالية...أو أنا يمكن بفتي بكده 

الوجبة الرئيسية...اللي هتفضل تزحف طول اليوم لحد ما توصل لها:
هتبقى غالبا طبق سلطة كبيرررررررررر !
مع التونة اللي هي بالماء...أو صدور الفراخ مسلوقة منزوعة الجلد طبعا...
ما هو مش هتبقى بتعمل دايت وتاكل الجلد...مش محتاجة مفهومية دي؟!
وفي السلطة خلي حبيبك عيش الغراب ضيف في السلطة...وطماطم بقى وطرنشات خيار وخس وحركات...
عايزك زي ما تكون قصادك بوصة وبتحاول تخليها عروسة.

واللي جاي هي أهم نقطة هتعجبك في البرنامج وهي:
إن لازم يكون فيه يوم أكل بدون قيود في الأسبوع.
تاكل فيه كل حاجة ولو حتى آيس كريم وبيتزا وبورجر..
عايزك تطلع من اليوم ده خسران كل اللي خسيته في الأسبوع...
عايزهم يشحنوك من محلات الأكل السريع على السرايا الصفرا...
أوعى تديهم فرصة يضيعوا عليك اليوم ده يا مسكين.
كُل يا مليجي يا جامد...ولو ضرب عليك النار...كُل برضو...

لا بجد اليوم ده مهم جدا في خداع الجسم...
خليني أقولك المعلومة الأي كلام دي...
وهي إن الجسم ممكن يضحي بالعضلات...قبل ما يضحي بالدهون... !
أيون...لأن الدهون دي هي القرشين اللي محوشهم الجسم لوقت عوزة...وما يضحيش بهم بالساهل.
فأنت كل ما توصل لليوم الفري ده...أديلوا بكرم...فيحس إنك مش بتخسس ولا حاجة...وهيأمنك ويسلمك الدهون.
تقوم واخده شنكل حرامية وداخل على الأيام العادية مع الدايت...
إلهي ما يرجعها أيام...
حاول تقلل من اللحوم الحمراء...علشان نسبة الدهون فيها عالية...استبدلها بصدور الفراخ والسمك خصوصا التونة...
هتلاقي نتائج أفضل.

طبعا ما فيش نشويات ولا مخبوزات...
ياني يا أختي يا اللي هموت وأنا بخسس يا أختي. 
يعني رغيف عيش في اليوم فلة جدا...ويتقسم على نصين...
كل نص يتحشر في وجبة مسكينة.
ويا سلام لو رغيف عيش بتاع تخسيس كمان.

وطبعا لا للسكريات...
خصوصا الشيكولاتة والحلويات والعصير اللي مش طبيعي.
دول أعداءك أوعى تسيبهم يضحكوا عليك يا قناوي يا بني...
دول عمرهم ما هيجوزوك هانومه...
البنت هتطير يا قناوي ...
اشتغل يا بني شوية خليها ترجع تلاقيك وراء الشحوم دي...

بس خود بالك قوي بقى من السكر اللي في الشاي والنسكافية...دي كمية من السعرات تكفي تخليك فيل صغير...ممكن تقلل على أد ما تقدر والأفضل لو تبطل...
طب ما ينفعش...حاول تخوش بقى على بدائل السكر اللي هي زي سبليندا والكلام ده...بس أقرا علشان تشوف لو له تأثير على صحتك ولا لا.
وممكن تستبدل البكش ده كله بعسل النحل الحقيقي...مش المضروب !
بس ما تكترش قوي في العسل لأن المعلقة الواحدة فيها حوالي 60 سعر حراري !
وإن كانوا بيقولوا إن العسل من السعرات اللي بتتحرق بسهولة...بس عموما خلي القاعدة بتاعتك...الصابع اللي يتعبك أقطعه...!

والنصيحة الأخيرة:
بعد ما توصل للهدف المطلوب...وتخس وتفرح بنفسك في المراية...
وتبقى وسط صحابك...اللي هيقعدوا يقولولك...شايفين كرشك راح...وكرشنا لسه كبير !

تقدر ساعتها تقلب البرنامج بقى وتديها سكريات وحلويات وخلافه
لحد ما ترجع كل اللي فاتك

لا يا عم بهزر...

أهم حاجة في التخسيس مش إنك توصل للهدف بس ...وتخس.
الأهم إنك تغير نظام حياتك...
عمرك ما هتفلح طول ما أنت بتسهر بالليل لحد الفجر وعمال تاكل.
لازم تصلح يومك
تصلي العشاء وتنام...وبعدين تصحى تصلى الفجر وتبدأ يومك بنشاط...
وتستمر في تقليل الحاجات اللي بتخن...وبتأذي الصحة.
خصوصا السموم البيضاء...السكر والدقيق.
وخليك في المسلوق والمشوي بدل المقلي.

وأهم حاجة انتظم في الرياضة...أو على الأقل المشي...
يعني أركن العربية بعيد شوية وأنزل أمشي لحد البيت...
أو حتة كوماندوز وأنت نازل من الميكروباص ودحرجة لحد ما توصل للبيت.

وأفتكر وأنت بتبتدي...
إن أصعب فترة هي أول يومين...
بعدها المعدة بتتعود وشهيتك بتقل...وبتتعود على طعم الكلوروفيل اللي هيملى حياتك...بس صدقني النتائج هتبقى مبهرة.
أوعى تضعف في أول يومين.
وخلي عندك ميزان وسجل الوزن....مهم قوي...
ويا سلام لو تاخود مقاسات الكرش علشان تعرف وصلت لفين.

وما تقوليش مش هقدر...ومش عارف إيه...شوف الحديث اللي جاي:
قالت عائشة رضي الله عنها لعروة بن الزبير:
كان يمر الهلال تلو الهلال تلو الهلال ثلاثة أهلة في شهرين ولا يوقد في بيوت رسول الله صلى الله عليه وسلم نار.
قال: فما كان طعامكم يا خالة؟
قالت: الأسودان التمر والماء.

بلاش دلع بقى وركز عايزينك في الأوليمبيات اللي جاية يا بطل !

اتقدم...اتقدم...وكفاية خلاص تتندم...
للخس...للجزر...
للخس...للجزر...
مش هتعطلنا كروش ... !



تابعونا على الفيسبوك - صفحة مخاميخ

الأحد، 14 سبتمبر 2014

قصة حياة طابع




- مجند مستجد بتاع الجرافيكس.
- أفندم.
- لك في الجرافيكس يا وله؟
- أكيد يا فندم...حضرتك أنا ياما عملت كروت أفراح وحنة وطهور وكله.
- تمام تمام...طب كنا عايزين نعمل طابع بريد لقناة السويس الجديدة.

موسيقى رأفت الهجان...المجند باكيا:
- بجد يا فندم...أنا هنال الشرف العظيم ده؟
القائد يخبط على كتف المجند: 
- أكيد يا بني...أنت تعبت في حياتك ومصر كلها محتجالك.
- طب يا فندم ما تجيبوا شركة جرافيكس نضيفة وأدوهم قرشين؟
- أخرس...فلوس...هو أنت ما تعرفش يعني إيه صندوق الباشا الكبير بيشرف عليه؟
- لا ما عرفش..
- ولا أنا كمان أعرف...بس خلينا في موضوعنا...وأجري صمم طابع البريد.
- طب فيه رسومات هندسية للمشروع.
- رسومات إيه؟ هندا أيه؟ أمشي ياض أرسم قناة رايحة جاية.
- تمام يا فندم.

بعد ما احتاس المجند وكل ما يرسم...تطلع الرسمة اللي قصاده على شكل طريق طنطا - شبين...أو طريق المنصورة - دكرنس..طريق واحد مش مرسوم عليه حتى خط واحد أبيض. بس الناس كلها عارفة إنه طريق رايح جاي.

المجند غرقان في عرقه...وفجأة التليفون رن...
الباشا على التليفون: 
- أيوه يا بني...خلصت...أحنا قولنا للباشا الكبير هنخلص بعد أسبوع...قالنا ما عنديش الكلام ده ... قصادكم ساعتين.

الولد احتاس أكتر...لحد ما فجأة لمعت في دماغه فكرة....قعد يدور على النت وكتب: "قناة ملاحية رايح جاي"
هووووووووووووب طلعت له قناة شكلها ابن ناس.
قام ناقشها وجاري على الباشا...اللي فرح قوي ونفذ تصميم الطابع...وبعته للباشا اللي فوقيه...واللي فوقيه بعته للي فوقيه...لحد ما وصلت للباشا الكبير اللي نفش ريشه وقال للي حواليه: 
- أنا ما عنديش الكلام بتاع أسبوع ده؟!

وهي دي كانت نهاية جهاز الكفتة...قصدي طابع قناة السويس....وتم إضافة صباع كفتة جديد في قصة فشلنا.

أزهى عصور الهرتلة.

المجد للكفتة !


تابعونا على الفيسبوك - صفحة مخاميخ

الأحد، 24 أغسطس 2014

وعلمنا الأسطول الأمريكي قيمة أخلاقية عظيمة !

بعد كلام الغيطي عن تظبيط جيشنا للأسطول الأمريكي !

تأملت الموقف ولقيت قيمة أخلاقية عالية قوي بصراحة
إحنا هاجمنا الأسطول الأمريكي...بالطائرات الروسية اللي اتطورت في مصر.
شايفين الأخلاق والقيم العالية.
ما رضيناش نهاجم السفن الأمريكية بالطائرات الأمريكية اللي عندنا.
وده لمراعاة صلة اللحام اللي بين السفن والطائرات الأمريكية !

وإن شاء الله تعمريها...ومذيعينك يتهبلوا فيها 


وأدي الفيديو للي يحب يضحك...قصدي يحب يتعلم


مدمنين فيسبوك

وأكبر دليل إننا بقينا مدمنين فيسبوك.

إن الخمس دقائق اللي النور بيجي فيهم.
بنجري ندخل على الفيسبوك.

ولو داخلين من الموبايل.
بدل ما نستخدم الشحن في تبديد بعض لحظات الظلام
لحبيب يتناول العشاء
أو طفل برئ بيعمل .... إحم إحم ... !

نقوم نخلص الشحن على الفيسبوك !


تابعونا على الفيسبوك - صفحة مخاميخ

الأربعاء، 11 يونيو 2014

بيتي فور التحرش !

- آلو...مين؟
- أيوه يا باشا...معك المستشار بتاعك.
- وعايز إيه يا مستشار يا بتاعي؟
- حضرتك فيه صفحة سمجة اسمها مخاميخ...
وعمالين يقولوا حضرتك مش بتتحرك علشان تشوف حل شامل لموضوع التحرش.
- حل شامل؟ هي القضية الفلسطينية ؟ 
وبعدين ما أنا قولت لوزير الداخلية يتصدى للموضوع !
- ما هي مخاميخ دي عمالة تسخر من الموضوع ده. وتقول قبضة أمنية وإن حضرتك أبيض يا ورد !
- خلاص خلي وزير الداخلية يتصرف ويجيب مخاميخ من قفاها !
- يا باشا طب وليه...؟
أنت عارف منظمات حقوق المخاميخ ووجع الدماغ اللي أحنا فيه.
- طب نعمل إيه يا مستش ؟!
- أنا شايف إننا نعمل اللي قالوا عليه في مخاميخ.
حضرتك تعمل اجتماع طارئ لمجلس الوزراء ومؤتمر صحفي وشوية صور على أما الأمور تهدى.
- اجتماع "طارق" مين بس؟
أنا مستني مكالمة أوباما من إمبارح !
- حضرتك تقدر تاخود الموبايل بتاع القصر الجمهوري معك.
- ما ينفعش...
مرسي رابط الموبايل بحبل في رجل المكتب...علشان يحافظ على أموال الشعب !
- طب ما تقصوا الحبل؟
- ما مرسي وجماعته واخدين المقص معهم...هو إحنا بنحارب الإرهاب من شوية !
وبعدين حتى لو الموبايل معايا...ما ينفعش أتحرك...
أحنا بنجهز الكحك والبيتي فور...
علشان كبير العرب...هيعمل حفلة علشان نجمع مساعدات علشان خاطر "مسر" !
- قصد حضرتك نتسول !
- أنا مش هسمحلك تقول كده تاني ... !
عموما خليني أبعت إس إم إس...لرئيس الورزاء يعمل لجنة من الأزهر والكنيسة وجميع الجهات المعنية علشان يدرسوا ظاهرة التحرش.
- فكرة جميلة يا باشا...ويا سلام لو تقيل وزير الداخلية !
- أنت مجنون يا بني...أقيل شقيقي...ده أحنا دافنينو سوا.
- طب إيه رأي سعادتك...لو تزور البنت المتحرش بها ؟!
- بس دي حركات مبارك يا بني؟
- لا يا باشا...صدقني...الحركة دي هتاكل قوي مع الناس اللي انتخبت حضرتك.
- أنت هتشتغل نفسك ياض؟ هو فيه حد انتخبني؟
دول كسروا بخاطري ... ومن ساعتها والدمعة ما فرقتش عيوني !
- معلهش علشان خاطري بس...زيارة للبنت...وشوية سهوكة من بتوع حضرتك...والدنيا هتبقى زي الفل !
- حاضر من عينيه...أقوم أغسل إيدي بس من العجين !


تابعونا على الفيسبوك - صفحة مخاميخ