ثورة 19 نوفمبر - يوم الجمعة 25 نوفمبر

 وعادت أسرة عدنان القماش من الميدان...:D

كنت ناوي أخود اجازة النهاردة...علشان اللعب بيحلو تاني يوم بعد المليونيات...
لكن قولت أفسح الأولاد شوية في مولد سيدي التحرير

عبد الله ابني...كان كل يوم يقولي أنت رايح فين يا بابا...أقوله رايح الثورة...
بقوله النهاردة: تعالى نروح الثورة...
قالي: هي شكلها إيه الثورة دي؟
ولما راح كان زعلان وقالي: الثورة زحمة قوي...

عبد الرحمن كان عامل شغل والبنات بتعاكسه...طبعا الولد طالع قمور زي أبوه :D
المهم إني طلبت منه يقولنا مطالبه وأسباب تواجده في التحرير...لكن لم يدلي بأي بيانات مش عارف ليه...!!!

لفينا شوية وطبعا ما فيش موضع لقدم...وأغلب الزوار من العائلات...
فعلا التحرير بقى مكان جميل للتنزه...

المهم شوية وبعد ما لفينا لفتين...روحت صليت المغرب وجيبت لهم بطاطا
وقعدنا على أحد الأرصفة السياحية الفاخرة...نضرب بطاطا مشوية...
هي أحسن من الذرة بتاع امبارح بكتير...:D
وطبعا فرقعة شوية صواريخ وشماريخ من بتاعت ألتراس عملت شغل...

لا جديد تحت الشمس النهاردة وده المعتاد بتاع المليونيات...ناس كتير وهتافات كتير...

كان فيه موضوع سياسي وحيد وهو تشكيل حكومة إنقاذ وطني تمثل التحرير
وكان فيه شباب طابعين ورق وعاملين استفتاء صغير على أد الحال في خيمة عند المجمع

هو تقريبا الجميع في الميدان متفقين على رحيل طنطاوي...
لكن إيه البديل...فتقريبا ما فيش بديل واحد معلن ومتفق عليه...

وطبعا كل اللي قابلتهم رافضين الجنزوري...مش لشخصه...لكن لأن اللي اتلسع من شرف ينفخ في الجنزوري...وكمان الطموح بقى أكبر من كده...الهدف هو طنطاوي ورحيل العسكر

الإخوان شعبيتهم مستمرة في النزيف...خصوصا بعد قصة مليونية الأقصى النهاردة...

أبو إسماعيل شعبيته كبيرة عند كتير من الناس...نظرا لمواقفة الشجاعة...وإن كنت شايف قرار عدم الاعتصام يوم 18 مأثر شوية على بعض الناس خصوصا غير الإسلاميين

أظن حكومة الإنقاذ ممكن تلاقي قبول عند الناس...لكن وجود البرادعي على رأسها هيخلي فيه ردود أفعال متباينة...نتيجة لمواقفة الضعيفة بعد الثورة...وكونه كان عايش حياته على تويتر...ده غير إنه مرفوض عند الكثير من الإسلاميين

أنا شخصيا وأظن فيه زيي كتير...كنا نازلين لرفع الظلم عن الناس اللي بيتضربو...ونتضرب معهم طبعا :D
وكمان رفض إهانة الناس لأننا لازم نعيش بكرامة...
انتهى عصر سحل المواطن المصري وأنا على قيد الحياة...سامع يا مشير...
زمانه بيرتعش بعد الكلمتين دول :D

خلاصة وجهة نظري إن الميدان لا يسيطر عليه أي فصيل...ويفتقد الرأس...تماما كما كان الحال في الثورة الأولى...

نراكم غدا إن شاء الله في تقرير السبت...وربنا يلطف لأن ده هو أهم يوم من وجهة نظري...
ربنا المستعان :)

الجمعة 25 نوفمبر
عدنان القماش

ثورة 19 نوفمبر - يوم الخميس 24 نوفمبر

 عدنا من الميدان بعون الله....

وعادت للميدان الثورة الضاحكة !

النهاردة كان متوقع إن الأمور تهدى خصوصا إن المجلس حس إن الضرب بيزود عزيمة الشعب والثوار ...فقالك أبنى جدار زي بتاع السفارة الصهيونية كده...

طبعا من أول ما وصلت...والكوميديا باينه...عصفورة بنت حلال سابت مئات الآلاف من البشر في الميدان...ومن غير ما أبقى تحت شجرة ولا غيره...قامت ألقت عليه قنبلة بيولوجية عضوية..
فطبعا قولت خير...أكيد هتكسي...

شوية روحت صليت المغرب...والحمد لله بدأت السماء تمطر رذاذ خفيف ساعد كتير على تنقية الجو...والناس كانت مبسوطة...

قابلت مجموعة من الأصدقاء...وقعدنا نهزر شوية...وبعدين مشيو بعد صلاة العشاء...

المهم الأجواء هادية....ومملة....وحاجة تزهق...ما فيش أي إثارة خالص...باستثناء العصفورة طبعا...الكلام ده لحد الساعة سبعة

وبعدها بقى ماسورة بشر وضربت في ميدان التحرير...اللي جايب مراته وولاده وولاد أخته...
واللي جاي بالموتسيكل بتاعه وكاتب اللي في قلبه على يافطة...واللي يعلق يافطة كبيرة عليها المشير حاطط شاش على عينه ومكتوب "تيجي أفقعلك عين وتفقعلي عين...ونعتذر لبعض أحنا الاتنين"
وغيره كتير

المهم أنا في اللحظة دي تأكدت إن الحرب الكيماوية تم تأجيلها شويتين...ولازم أقوم بوضع الأسلحة في غمدها....فروحت حاطط الماسك والنضارة في الكيس مرة تانية...
وعنها بقى روحت نازل وسط الناس ومشترى كوز ذرة من أبو جنية...
أسوء أنواع الذرة في التاريخ بصراحة...عبارة عن زلط مرصوص على عصاية...

المهم...اشتبكت مع الجموع وقعدت أتفرج...تمام كده زي ما تبقى ماشي في مولد السيدة...لكن لما يبقى فيه زوار من الجامعة الأمريكية...
شوية والعربيات بدأت تدخل لقرب الميدان من شارع قصر النيل...وبدون مقدمات ظهر الناس اللي بتساعد الباشاوات إنهم يركنوا...
وشوية وبقى فيه كراسي بلاستيك وتربيزات...واتعمل قهاوي في السريع...
ذكي الشعب ده !

ودليل الذكاء الأكبر...قولت أروح اشوف الماسك بتاع الغاز بقى بكام...زمانه بتراب الفلوس...
لكن طبعا الرجل اللي كان بيبع ماسكات اختفى...وظهر مكانه بتاع حلبسه...وبتاع كبدة ومومبار وكل المأكولات الوبائية اللذيذة دي...
ويقولك الغازات سامة...سامة دي تبقى خالة المجلس...
أحنا بناكل السم...هيفرق إننا نشمه...

ونتيجة حتمية للاستظراف اللي ضرب الميدان...والتحول العجيب من ساحة قتال إلى مسرح كوميدي...كل حاجة اتغيرت...حتى الهتافات...
يعني مثلا من هتاف "الشعب يريد إعدام المشير"...بقى الهتاف "المشير بيهيس...عايز يبقى الريس"
شوية كده وخلصت جولتي وروحت علشان استعد لمليونية بكره...
أصلا الميدان خلاص كان داخل في مليوينة من قبل ما أمشى...
وشكلها سهرة صباحي في الميدان زي الحسين كده...

مراسلكم من مولد التحرير....سيدي عدنان القماش...:D

أروح أكل وأرجع لكم تاني...إن شاء الله

الخميس 24 نوفمبر
عدنان القماش

ثورة 19 نوفمبر - يوم الأربعاء 23 نوفمبر

 عدنا بعون الله...
النهاردة كان أصعب يوم عليه في النزول علشان كنت مرهق جسديا وكمان الغاز عمل لي صداع.
لكن بمجرد إني نزلت الميدان...وشميت الغاز...عادت لي حيويتي تماما...وأكتشفت إني بقيت مدمن :D

النهاردة كان يوم مهم علشان الضرب كله بيحصل بعد المليونيات...لأن العدد بيقل في عيون الذئاب.

اليوم كان متوتر...لدرجة إن الشيخين اللي صليت معهم المغرب والعشاء...الاتنين سهيو في الصلاة...

المهم كان فيه هدنه من العصر كده توسط فيها شيوخ من الأزهر...
وحسب كلام شهود العيان، إن الشباب اللي كانت في المواجهة حضنوا العساكر بعد إعلان الهدنة...لكن الواطي واطي طبعا
وقوات الأمن كسرت الهدنة وضربوا الشباب وهم بيصلوا المغرب

وأول ما بدأ الميدان يترج بالهتاف "الشعب يريد إسقاط المشير"...
ما تفهمش إيه السر في الهتاف ده...قامت القنابل نزلت على الميدان بالقرب من ناصية شارع محمد محمود...وعنها بقى يا رجالة....بدأ الناس يتحركوا في اتجاه عمر مكرم في أعداد غفيرة هروبا من الغاز...طبعا الكل اضطر ينط من فوق السور المحيط بالمسجد...علشان الطوفان البشري كان هيهرسه...
والغاز كان بشع بصراحة...رغم إني معايا ماسك من أبو عشرة جنية مش كمامة من بتاعت الفقراء :D
لكن الماسك نفع شوية..لكن طبعا عنيه دمعت وكنت هتعمي...فبعدها روحت اشتريت نضارة بتاعت سباحة...
الظريف في قصة الشراء دي...لما الأعداد بتبقى قليلة الماسك ممكن تجيبه بسبعة جنية ونص، ولو الأعداد كبيرة بيبقى بعشرة جنية...ووقت الضرب بالغاز، السعر بيبقى 15 جنية
بورصة في قلب الميدان....:D

المهم الشعب رجع تاني يهتف بسقوط المشير...
والإخوة السلفيين أكرمهم الله كانوا هيعلنوا الجهاد...وقعدوا يهتفوا لا إله إلا الله....المشير عدو الله...وكمان خلوا كل الناس تهتف "الله أكبر"
حقيقي الناس كلها اتخنقت من "المشين" حسب ما ناس كتير بقت تحب تسميه

اللذيذ بقى في المصريين...إن الحياة كأنها عادي جدا...كأنك ماشي في نادي اجتماعي كبير...الضرب يخلص...تلاقي الناس بترجع تشتري البطاطا واللب والسوداني والشاي
وشوية تلاقي ناس بيوزعوا عصائر وكرواسون وحلويات...بس ما فيش كنتاكي للأسف

وده من وجهة نظري أمر طبيعي، لأنه على الرغم إن الغاز رائحته زبالة...
إنما رائحة عوادم السيارات أزبل بصراحة، خصوصا لو اتزنقت فوق كوبري ستة اكتوبر...والزحمة اللي حواليك بتحس معها بالود والدفء...على عكس الزحمة اللي تخنق في الأتوبيس أو المترو...

المهم ما كنش معايا أصحاب النهاردة، واحد منهم وصل متأخر قبل ما أمشي بشوية
فقضيت معظم الوقت في حلقات نقاش بين مواطنين طيبين قوي...
ما تعرفش الروح دي بتروح فين بعد ما بنمشي من الميدان...!!!

وطبعا الإشاعات كل شوية تشتغل إن البلطجية جايين من السيدة...البلطجية مش عارف إيه.
المهم تم القبض على واحد بلطجي...ومش هوصف لكم الزفة اللي كان فيها...حوالي مليون واحد حواليه...والكل بيهتف بلطجي بلطجي

وكمان المخبرين وبتوع الأمن المندسين...منتشرين في الميدان وبيبقوا مكشوفين قوي وهم بيسألوا الناس هو احنا هنا ليه وغيره...
وكان فيه ناس عمالة تحاول تقنع الناس إننا نحافظ على فرص إقامة الانتخابات... وفيه ناس تقول الميدان ينفض...لكن الناس كانت بترفض الفكرة وبياكلوا اللي بيتكلم...ورأي الناس في الميدان...انتخابات إيه اللي يشرف عليها السفاحين دول...إزاي نثق في أهاليهم تاني...لازم يمشوا...

عموما هي الروح فوق الوصف...والشباب اللي في محمد محمود فعلا ربنا يحميهم وينصرهم...وحوش يعني وحوش...

أسوء أحداث اليوم هو وفاة طفل رضيع لقيوه وأعلنوا الخبر عبر مكبرات الصوت في مسجد عمر مكرم...كل الناس قعدت تحسبن على المجلس السمكري وعمايله السودا...
حسبنا الله ونعم الوكيل

ربنا المستعان...أروح أكل وأرجع لكم إن شاء الله

الأربعاء 23 نوفمبر
عدنان القماش

ثورة 19 نوفمبر - يوم الثلاثاء 22 نوفمبر

عدنا من الميدان بعون الله وكرمه...
خلاص يا ولاد...يقدر الجماعة بتوع الصور التذكارية ينزلوا ياخدوا كام صورة
ويبقى يكذبوا على ولادهم ويقولوا إحنا من جيل الثورة...

بفضل الله وحوله...تم السيطرة على الميدان تماما
وإجبار المجلس على التنازل في سلسلة معهودة من القرارت الغبية والمتأخرة...
التي ستنتهي برحيله إن شاء الله

ما فيش مكان فاضي في الميدان...الأعداد فوق الوصف ما شاء الله...
وعلشان تنتقل من نقطة للتانية...يبقى سنتك مش فايته...هتاخودها في عشر سنين
ما فيش منصات خالص...وده دليل توحد الناس تاني...مش زي ما كل واحد كان يقف عند منصته
والخيم بدأت تتنصب بأعداد كبيرة...وبطاطين بتتوزع وعصائر وحلويات

بس لسه رائحة الدخان بشعة...رغم إن الضرب مفروض أنه وقف من فترة...
وفيه ناس لسه بتقع من الاختناق...خصوصا البنات...
والرائحة ضاربة حتى في قلب المترو...رغم إن معظم منافذه بعيده عن منطقة الضرب في محمد محمود...

من أكثر الأحداث إثارة كان ظهور الرائد أحمد شومان تاني في بلكونة وهو بيصور مع قناة فضائية...وقاعد يشاور للناس بالعلم وكان شكله سعيد والناس تهتف الله أكبر
واحد حب يقول الشعب و الجيش إيد واحدة...الناس كانت هتضربه بالجزمة..والكل قاله لسه بدري قوي علشان الهتاف ده يرجع تاني

وطبعا تعليق عروسة تمثل المشير والشاب كان بينزلها للناس يضربوها بالجزمة...
وبعدين يطلعها هو ويضربها بالجزمة...وأنا كنت أقولهم يا جماعة أحنا مش بنعذب الأسرى :D

كل الهتافات اللي كانت بتتقال في الفرعون بقت تتقال في المشير
بالإضافة لهتافين جداد "عايزينها تبقى سوريا...هنخليهلكم ليبيا"
"الشعب يريد إعدام المشير"...والهتاف الأخير عمال يزيد مع الوقت...ويكتسب شعبية كبيرة قوي

بالنسبة لموقف الناس من اجتماعات المجلس والقوى البلاستيكية
فالناس كلها رافضة كل قصص التهييس والتهريج...والكل بيتكلم إن المجلس لازم يمشي
حتى رغم الكلام عن حكومة إنقاذ وبطاطس وتسليم السلطة في يونيو...
وإن كان فيه ناس مياله لفكرة إنه يشكل مجلس موازي يضم أبو إسماعيل والبرادعي وأبو الفتوح...وإنه يتم يحدد ميعاد تسليم السلطة والانتخابات تتم في ميعادها...
لكن الثقة مفقودة تماما في إن المجلس يتساب في مكانه...
وفكرة إن المجلس يعمل استفتاء شعبي جديد على استمراره في السلطة من عدمه...فكرة مرفوضة شكلا ومضمونا

عموما هي نفس الثورة الأولى بالظبط...لكن الفرق الرئيسي إن الناس محروقة أكتر من أنها لبست السلطانية الكام الشهر اللي فاتوا...

أحب أختم بتحية خاصة للشباب الأبطال اللي وقفوا زي الأسود في شارع محمد محمود
الله يحفظهم ويكرمهم في الدنيا والآخرة...ويتقبل قتلاهم في الشهداء بفضله وكرمه ورحمته

أروح أكل بقى وارجع لكم تاني إن شاء الله


الثلاثاء 22 نوفمبر
عدنان القماش

ثورة 19 نوفمبر - يوم الاثنين 21 نوفمبر

الحمد لله...عدنا من الميدان...مبروك يا جماعة...
بفضل الله...الشعب ركب الميدان...ولا عزاء للمتخاذلين...
سبتهم والأعداد ضخمة جدا...شكل المليونيات كده...وكانت في تزايد

هتاف "الشعب يريد اسقاط المشير" هو الهتاف الرسمي للميدان...

طبعا مش هتكلم عن الغاز بقى إدمان بصراحة والواحد ما عدش بيتأثر به بعون الله
معظم الناس نازلة بعد اللي شافوه امبارح من سحل وجثث بتترمي في الزبالة...

الناس اللي بايته بتنام لما بنوصل لهم الصبح...وبيصحوا بقى على المغرب...
فبتبقى قمة الحشود في اللحظة دي...

روحت مع صاحبي لحد الداخلية من الناحية التانية...مش من عند الجامعة الأمريكية
وكانوا بيضربوا قنابل غاز...
ورصاص حي..بس غالبا في الهوا...وصوت السلاح الآلي بيبقى زي العسل بصراحة

شوية ورجعنا الميدان...وكالمعتاد قبل المغرب بنص ساعة...بقى كرنفال ضرب قنابل غاز
بسأل صاحبي: هم الناس دول مش بيصلوا المغرب؟؟؟ قعد يضحك مش عارف ليه :D
روحنا صلينا ورجعنا تاني...
شوية وكان شعاع ليزر أخضر على الحيطة...زي بتوع القناصة...
الناس اتخضت شوية...وبعدين طنشوا الهبل ده...

وفيه اتنين مخبرين كانوا واقفين معانا في بيان استطلاعي...
طبعا هم ما قالوش إنهم مخبرين...بس هم مكشوفين قوي يعني...
المهم قولنا لهم إحنا أخواتنا ما يتقتلوش ويترموا في الزبالة...
الإنسان له كرامة...فما بالكم لو كان أخوك في الوطن...
وطبعا حبوا يعملوا عظماء في السياسية...فتظبطوا...
بس هم في الأصل نازلين يشوفوا آراء الناس

ما تصدقوش أي كلام عن البلطجية...
التنظيمات المحترمة بتنضم للميدان بزيادة يوم عن التاني
النهاردة مثلا انضم لنا مسيرة كبيرة من أطباء عين شمس...
والميدان فيه من كل شكل ولون
اللي ملتحي واللي روش ...
منتقبات...محجبات...غير محجبات...كل الأشكال والألوان
المنتمين للتيار الإسلامي تواجدهم ملحوظ...لكن الأغلبية متنوعة...

عموما نغسل السموم ونشوف هنعمل إيه بكره إن شاء الله
لا تنسوا الميدان من صالح الدعاء...ربنا ينصرنا...


عدنان القماش
الاثننين 21 نوفمبر

ثورة 19 نوفمبر - يوم الأحد 20 نوفمبر

 عدنا من الميدان بسلامة الله....
كلاب الشرطة بالإضافة لكلاب الشرطة العسكرية...قاموا بالهجوم علينا من جهتين...
وضرب وقنابل مسيلة للدموع لحد ما الواحد مش قادر يتنفس...
وعمال أكح بشدة...وفيه ناس كان بيغمى عليها...
وسمعت عن ناس وقعت بضرب الرصاص...بس أنا ما شفتش بنفسي...
كنا مشغوليين بشيل واحد بيغمى عليه...وبنجري به...لكن في الزحمة والجري مش عارف راح مننا فين...التدافع بيبقى شديد جدا...
جرينا لحد المتحف المصري...وبعدين جريوا ورانا تاني....
روحنا عبد المنعم رياض...وهناك بدأ يظهر الناس اللي ما تفهمش هم مين..غالبا البلطجية اللي بينظموا الشغل في المواقف
وقعدوا يمشوا الميكروباصات كلها بالشخط والزعيق...شكلهم عايزين يقفلوا كل المنافذ...
لكن الروح كانت في أعلى درجة والأمل بعد ربنا في الشباب الشجاع...
والفوج التاني من الشباب صحابنا منطلقين للميدان على أما أحنا نلقط نفسنا...
بلا قوى سياسية...بلا أحزاب كارتونية...بلا حزب كنبه...

حسبنا الله ونعم الوكيل في كلاب الفرعون كلهم...
جاري تحميل الفيديوهات...


عدنان القماش
الأحد 20 نوفمبر