الدايت الطازة...!

طيب يا جماعة أنا قررت أساهم في إقرار السلام في العالم كله.

وهقولكم برنامجي الغذائي اللي هيحولك من أسد عجوز شرس وبكرش...إلى غزال شاب رشيق ووديع.

وطبعا لازم تراجعوا الطبيب علشان تتأكدوا إنه ينفعكم. 

من المفروض الوجبات عددها يزيد وكمياتها تقل...
يعني خمسة أو ستة بدل ثلاثة...
بس كل واجبة أصغر في الحجم.

والأهم من ده كله هو
الحركة والرياضة...
وما فيش اي أكل بعد المغرب...
ولو جوعت قوي بالليل...أديها جزرتين ثلاثة من اللي كوكي وميمي بيسموه بيبي جزر...
اللي هو لا يغني ولا يسمن من جوع ده...أيون...الجزر الكبير بيزهق أصله...

الفكرة كلها عبارة عن شوية سعرات الجسم محتاجها...ولو أخد أكتر منها...وما عرفش يحرقها...هيحولها لسيادتك رصيد...والرصيد ده عبارة عن دهون.
عايزك بقى تجيب عدسة مكبرة وتقعد تشوف كل عبوة فيها سعرات حرارية أد إيه...؟
قفشتك يا مجرم...سعر برئ ماشي في حاله...تاكله ليه؟!

من الفنيات:
استبدال اللبن كامل الدسم...باللبن المنزوع الدسم...أو لبن اللوز.
الموز والجزر والخس والسلطة دول رفقاء السلاح من أول لحظة تخسيس.

من الأسرار الفنية العظيمة:
الفاصوليا السوداء...لو ما لقتش خوش على الفاصوليا البيضا.
طبعا تتاكل مسلوقة مش مطبوخة...وممكن تعصر عليها شوية ليمون وتديها شوية بهارات في اللذيذ.
وأنا ساعات بحط عليه سنة زيت زيتون وسنة خل.
وجبة هتشبعك وسعراتها مش عالية...أو أنا يمكن بفتي بكده 

الوجبة الرئيسية...اللي هتفضل تزحف طول اليوم لحد ما توصل لها:
هتبقى غالبا طبق سلطة كبيرررررررررر !
مع التونة اللي هي بالماء...أو صدور الفراخ مسلوقة منزوعة الجلد طبعا...
ما هو مش هتبقى بتعمل دايت وتاكل الجلد...مش محتاجة مفهومية دي؟!
وفي السلطة خلي حبيبك عيش الغراب ضيف في السلطة...وطماطم بقى وطرنشات خيار وخس وحركات...
عايزك زي ما تكون قصادك بوصة وبتحاول تخليها عروسة.

واللي جاي هي أهم نقطة هتعجبك في البرنامج وهي:
إن لازم يكون فيه يوم أكل بدون قيود في الأسبوع.
تاكل فيه كل حاجة ولو حتى آيس كريم وبيتزا وبورجر..
عايزك تطلع من اليوم ده خسران كل اللي خسيته في الأسبوع...
عايزهم يشحنوك من محلات الأكل السريع على السرايا الصفرا...
أوعى تديهم فرصة يضيعوا عليك اليوم ده يا مسكين.
كُل يا مليجي يا جامد...ولو ضرب عليك النار...كُل برضو...

لا بجد اليوم ده مهم جدا في خداع الجسم...
خليني أقولك المعلومة الأي كلام دي...
وهي إن الجسم ممكن يضحي بالعضلات...قبل ما يضحي بالدهون... !
أيون...لأن الدهون دي هي القرشين اللي محوشهم الجسم لوقت عوزة...وما يضحيش بهم بالساهل.
فأنت كل ما توصل لليوم الفري ده...أديلوا بكرم...فيحس إنك مش بتخسس ولا حاجة...وهيأمنك ويسلمك الدهون.
تقوم واخده شنكل حرامية وداخل على الأيام العادية مع الدايت...
إلهي ما يرجعها أيام...
حاول تقلل من اللحوم الحمراء...علشان نسبة الدهون فيها عالية...استبدلها بصدور الفراخ والسمك خصوصا التونة...
هتلاقي نتائج أفضل.

طبعا ما فيش نشويات ولا مخبوزات...
ياني يا أختي يا اللي هموت وأنا بخسس يا أختي. 
يعني رغيف عيش في اليوم فلة جدا...ويتقسم على نصين...
كل نص يتحشر في وجبة مسكينة.
ويا سلام لو رغيف عيش بتاع تخسيس كمان.

وطبعا لا للسكريات...
خصوصا الشيكولاتة والحلويات والعصير اللي مش طبيعي.
دول أعداءك أوعى تسيبهم يضحكوا عليك يا قناوي يا بني...
دول عمرهم ما هيجوزوك هانومه...
البنت هتطير يا قناوي ...
اشتغل يا بني شوية خليها ترجع تلاقيك وراء الشحوم دي...

بس خود بالك قوي بقى من السكر اللي في الشاي والنسكافية...دي كمية من السعرات تكفي تخليك فيل صغير...ممكن تقلل على أد ما تقدر والأفضل لو تبطل...
طب ما ينفعش...حاول تخوش بقى على بدائل السكر اللي هي زي سبليندا والكلام ده...بس أقرا علشان تشوف لو له تأثير على صحتك ولا لا.
وممكن تستبدل البكش ده كله بعسل النحل الحقيقي...مش المضروب !
بس ما تكترش قوي في العسل لأن المعلقة الواحدة فيها حوالي 60 سعر حراري !
وإن كانوا بيقولوا إن العسل من السعرات اللي بتتحرق بسهولة...بس عموما خلي القاعدة بتاعتك...الصابع اللي يتعبك أقطعه...!

والنصيحة الأخيرة:
بعد ما توصل للهدف المطلوب...وتخس وتفرح بنفسك في المراية...
وتبقى وسط صحابك...اللي هيقعدوا يقولولك...شايفين كرشك راح...وكرشنا لسه كبير !

تقدر ساعتها تقلب البرنامج بقى وتديها سكريات وحلويات وخلافه
لحد ما ترجع كل اللي فاتك

لا يا عم بهزر...

أهم حاجة في التخسيس مش إنك توصل للهدف بس ...وتخس.
الأهم إنك تغير نظام حياتك...
عمرك ما هتفلح طول ما أنت بتسهر بالليل لحد الفجر وعمال تاكل.
لازم تصلح يومك
تصلي العشاء وتنام...وبعدين تصحى تصلى الفجر وتبدأ يومك بنشاط...
وتستمر في تقليل الحاجات اللي بتخن...وبتأذي الصحة.
خصوصا السموم البيضاء...السكر والدقيق.
وخليك في المسلوق والمشوي بدل المقلي.

وأهم حاجة انتظم في الرياضة...أو على الأقل المشي...
يعني أركن العربية بعيد شوية وأنزل أمشي لحد البيت...
أو حتة كوماندوز وأنت نازل من الميكروباص ودحرجة لحد ما توصل للبيت.

وأفتكر وأنت بتبتدي...
إن أصعب فترة هي أول يومين...
بعدها المعدة بتتعود وشهيتك بتقل...وبتتعود على طعم الكلوروفيل اللي هيملى حياتك...بس صدقني النتائج هتبقى مبهرة.
أوعى تضعف في أول يومين.
وخلي عندك ميزان وسجل الوزن....مهم قوي...
ويا سلام لو تاخود مقاسات الكرش علشان تعرف وصلت لفين.

وما تقوليش مش هقدر...ومش عارف إيه...شوف الحديث اللي جاي:
قالت عائشة رضي الله عنها لعروة بن الزبير:
كان يمر الهلال تلو الهلال تلو الهلال ثلاثة أهلة في شهرين ولا يوقد في بيوت رسول الله صلى الله عليه وسلم نار.
قال: فما كان طعامكم يا خالة؟
قالت: الأسودان التمر والماء.

بلاش دلع بقى وركز عايزينك في الأوليمبيات اللي جاية يا بطل !

اتقدم...اتقدم...وكفاية خلاص تتندم...
للخس...للجزر...
للخس...للجزر...
مش هتعطلنا كروش ... !


تابعونا على الفيسبوك - صفحة مخاميخ

قصة حياة طابع

- مجند مستجد بتاع الجرافيكس.
- أفندم.
- لك في الجرافيكس يا وله؟
- أكيد يا فندم...حضرتك أنا ياما عملت كروت أفراح وحنة وطهور وكله.
- تمام تمام...طب كنا عايزين نعمل طابع بريد لقناة السويس الجديدة.

موسيقى رأفت الهجان...المجند باكيا:
- بجد يا فندم...أنا هنال الشرف العظيم ده؟
القائد يخبط على كتف المجند: 
- أكيد يا بني...أنت تعبت في حياتك ومصر كلها محتجالك.
- طب يا فندم ما تجيبوا شركة جرافيكس نضيفة وأدوهم قرشين؟
- أخرس...فلوس...هو أنت ما تعرفش يعني إيه صندوق الباشا الكبير بيشرف عليه؟
- لا ما عرفش..
- ولا أنا كمان أعرف...بس خلينا في موضوعنا...وأجري صمم طابع البريد.
- طب فيه رسومات هندسية للمشروع.
- رسومات إيه؟ هندا أيه؟ أمشي ياض أرسم قناة رايحة جاية.
- تمام يا فندم.

بعد ما احتاس المجند وكل ما يرسم...تطلع الرسمة اللي قصاده على شكل طريق طنطا - شبين...أو طريق المنصورة - دكرنس..طريق واحد مش مرسوم عليه حتى خط واحد أبيض. بس الناس كلها عارفة إنه طريق رايح جاي.

المجند غرقان في عرقه...وفجأة التليفون رن...
الباشا على التليفون: 
- أيوه يا بني...خلصت...أحنا قولنا للباشا الكبير هنخلص بعد أسبوع...قالنا ما عنديش الكلام ده ... قصادكم ساعتين.

الولد احتاس أكتر...لحد ما فجأة لمعت في دماغه فكرة....قعد يدور على النت وكتب: "قناة ملاحية رايح جاي"
هووووووووووووب طلعت له قناة شكلها ابن ناس.
قام ناقشها وجاري على الباشا...اللي فرح قوي ونفذ تصميم الطابع...وبعته للباشا اللي فوقيه...واللي فوقيه بعته للي فوقيه...لحد ما وصلت للباشا الكبير اللي نفش ريشه وقال للي حواليه: 
- أنا ما عنديش الكلام بتاع أسبوع ده؟!

وهي دي كانت نهاية جهاز الكفتة...قصدي طابع قناة السويس....وتم إضافة صباع كفتة جديد في قصة فشلنا.

أزهى عصور الهرتلة.

المجد للكفتة !


تابعونا على الفيسبوك - صفحة مخاميخ

وعلمنا الأسطول الأمريكي قيمة أخلاقية عظيمة !

بعد كلام الغيطي عن تظبيط جيشنا للأسطول الأمريكي !

تأملت الموقف ولقيت قيمة أخلاقية عالية قوي بصراحة

إحنا هاجمنا الأسطول الأمريكي...بالطائرات الروسية اللي اتطورت في مصر.

شايفين الأخلاق والقيم العالية.

ما رضيناش نهاجم السفن الأمريكية بالطائرات الأمريكية اللي عندنا.

وده لمراعاة صلة اللحام اللي بين السفن والطائرات الأمريكية !

وإن شاء الله تعمريها...ومذيعينك يتهبلوا فيها 

وأدي الفيديو للي يحب يضحك...قصدي يحب يتعلم

مدمنين فيسبوك

وأكبر دليل إننا بقينا مدمنين فيسبوك.

إن الخمس دقائق اللي النور بيجي فيهم.
بنجري ندخل على الفيسبوك.

ولو داخلين من الموبايل.
بدل ما نستخدم الشحن في تبديد بعض لحظات الظلام
لحبيب يتناول العشاء
أو طفل برئ بيعمل .... إحم إحم ... !

نقوم نخلص الشحن على الفيسبوك !

تابعونا على الفيسبوك - صفحة مخاميخ

بيتي فور التحرش !

- آلو...مين؟
- أيوه يا باشا...معك المستشار بتاعك.
- وعايز إيه يا مستشار يا بتاعي؟
- حضرتك فيه صفحة سمجة اسمها مخاميخ...
وعمالين يقولوا حضرتك مش بتتحرك علشان تشوف حل شامل لموضوع التحرش.
- حل شامل؟ هي القضية الفلسطينية ؟ 
وبعدين ما أنا قولت لوزير الداخلية يتصدى للموضوع !
- ما هي مخاميخ دي عمالة تسخر من الموضوع ده. وتقول قبضة أمنية وإن حضرتك أبيض يا ورد !
- خلاص خلي وزير الداخلية يتصرف ويجيب مخاميخ من قفاها !
- يا باشا طب وليه...؟
أنت عارف منظمات حقوق المخاميخ ووجع الدماغ اللي أحنا فيه.
- طب نعمل إيه يا مستش ؟!
- أنا شايف إننا نعمل اللي قالوا عليه في مخاميخ.
حضرتك تعمل اجتماع طارئ لمجلس الوزراء ومؤتمر صحفي وشوية صور على أما الأمور تهدى.
- اجتماع "طارق" مين بس؟
أنا مستني مكالمة أوباما من إمبارح !
- حضرتك تقدر تاخود الموبايل بتاع القصر الجمهوري معك.
- ما ينفعش...
مرسي رابط الموبايل بحبل في رجل المكتب...علشان يحافظ على أموال الشعب !
- طب ما تقصوا الحبل؟
- ما مرسي وجماعته واخدين المقص معهم...هو إحنا بنحارب الإرهاب من شوية !
وبعدين حتى لو الموبايل معايا...ما ينفعش أتحرك...
أحنا بنجهز الكحك والبيتي فور...
علشان كبير العرب...هيعمل حفلة علشان نجمع مساعدات علشان خاطر "مسر" !
- قصد حضرتك نتسول !
- أنا مش هسمحلك تقول كده تاني ... !
عموما خليني أبعت إس إم إس...لرئيس الورزاء يعمل لجنة من الأزهر والكنيسة وجميع الجهات المعنية علشان يدرسوا ظاهرة التحرش.
- فكرة جميلة يا باشا...ويا سلام لو تقيل وزير الداخلية !
- أنت مجنون يا بني...أقيل شقيقي...ده أحنا دافنينو سوا.
- طب إيه رأي سعادتك...لو تزور البنت المتحرش بها ؟!
- بس دي حركات مبارك يا بني؟
- لا يا باشا...صدقني...الحركة دي هتاكل قوي مع الناس اللي انتخبت حضرتك.
- أنت هتشتغل نفسك ياض؟ هو فيه حد انتخبني؟
دول كسروا بخاطري ... ومن ساعتها والدمعة ما فرقتش عيوني !
- معلهش علشان خاطري بس...زيارة للبنت...وشوية سهوكة من بتوع حضرتك...والدنيا هتبقى زي الفل !
- حاضر من عينيه...أقوم أغسل إيدي بس من العجين !

تابعونا على الفيسبوك - صفحة مخاميخ

التحرش الجنسي !

هو إيه حكاية فتح باب الدعارة لمواجهة التحرش؟

إيه الخيبة اللي أحنا فيها دي؟هو إيه أختك تعمله بمزاجها ... أحسن ما يتعمل فيها غصب عنها؟

يا خلقأفتحوا باب الحلال واتبعوا شرع الله وسنة رسوله عليه الصلاة والسلام:
" إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره. 

هو اللي أحنا فيه ده مش فتنة وفساد كبير؟

كل واحد عايز يجوز بنته لأمير من الأمراء؟ يا أخي اسمع كلام ربنا:"إِن يَكُونُوا فُقَرَاء يُغْنِهِمُ اللَّهُ مِن فَضْلِهِ وَاللَّهُ وَاسِعٌ عَلِيمٌ"

وقال رسول الله صلى الله عليه وسلم:"يا معشر الشباب، من استطاع الباءة فليتزوج، فإنه أغض للبصر وأحصن للفرج، ومن لم يستطع فعليه بالصوم، فإنه له وجاء" متفق عليه.

هتقولي منين؟ الموضوع عايز اقتصاد وفلوس...وأنا مش قادر أديك.

دور الدولة،،،

يا عم ابتدي باللي تقدروا عليه.أقفلوا المجاري الأخلاقية اللي ضاربة في المجتمع.راقصات وعاريات على قمة المجتمع. وأهو هيتصدروا المشهد في رمضان.
وشوية منتجين ومخرجين وممثلين فشلة - إلا من رحم ربي -ما يعرفوش غير إنتاج هز الوسط والإثارة الجنسية.

أظبطوا منظومة التعليم والدين والثقافة

وقفوا المخدرات .. اللي لحست دماغ الشباب.

أضربوا على يد الفاسدين.ما هو لو حاربنا الفساد...وكل حرامي...عرفنا نرجع فلوس الشعب اللي سرقها.وبعدين بنيت مساكن ووفرت وظائف. ما حدش لا هيتحرش ولا غيره.

دور المجتمع،،،

ربوا عيالكم...مش كل واحد عمال يخلف ويرمي في الشارع. ولا سايب التلفزيون والنت هم اللي يربوا.

كل واحد يصلح نفسه ويتقى الله في عمله.بلاش رشاوي وبلاش محسوبية وبلاش سرقة.

أفتحوا باب الحلال. وأقفلوا منابع الخراب.

وكل واحد يتقي الله في نفسه وبيته وعياله.

"ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ"

حسبنا الله ونعم الوكيل.يا رب أنت المستعان.

تابعونا على الفيسبوك - صفحة مخاميخ

حل مشكلة المشردين - مترجم

فقرة مخاميخ مترجمة،،،

في دراسة عن المشردين، قامت بها جامعة نورث كارولينا الأمريكية .

أثبتت الدراسة أن الحل الأمثل لهذه المشكلة، هو توفير مساكن تشمل الخدمات الضرورية لهؤلاء المشردين.

رغم أن حل توفير السكن يبدو كحل مكلف. لكن من الناحية الإقتصادية ووفقا لأرقام وإحصائيات الدراسة، فإن توفير السكن هو الحل الأوفر.

قاموا في الدراسة بتوفير 85 شقة في مدينة تشارلوت في ولاية نورث كارولينا...في بدايات العام 2012.
وقام فريق البحث الجامعي بمتابعة مجموعة من المشردين لمدة عام قبل تسكينهم في الشقق.
ثم متابعتهم لعام آخر بعد تسكينهم.

فوجدوا تحولا دراماتيكيا في الأموال المنفقة على الرعاية الصحية، والخدمات الأمنية والشرطية.

انخفضت الفاتورة الصحية لهؤلاء المشردين من 2.5 مليون دولار إلى 760 ألف دولار.
وانخفضت الحاجة لحالات الطوارئ من 571 إلى 124.

وبالنسبة للشق الأمني.
فقد انخفضت تكاليف القبض على المشردين وحبسهم.
بعد انخفاض عدد حالات القبض على المشردين بنسبة 78%.
وانخفضت فترات حبسهم في السجون بنسبة 84%.

كذلك تزداد الرغبة في العلاج من الإدمان لدى المشردين بعد تسكينهم.

وأختتمت المقالة التي تتحدث عن الدراسة بالقول:
"نعم تسكين المشردين عملية أخلاقية، أكثر من مجرد النظر للتكاليف الخاصة بذلك. لكن ما زالت الدراسة تقدم المساعدة لأخذ الشقين الأخلاقي والإقتصادي في الاعتبار لحل المشكلة"

ترجمة: عدنان القماش.

----
تعليقات مخموخية سمجة:
- طبعا ما تقوليش هو إزاي مشرد وبيقدر يروح يتعالج...دي بلاد متخلفة يا عم الحاج.
مفروض إن مُشرد ... يعني ياخود رصاصة بخمس قروش ونخلص منه !

- وكمان ما حدش يسألني إزاي المُشرد معه كلب في الصورة.
المشردين مقامات حضرتك 

#أنا_مش_قادر_أديك
#إحنا_متراقبين
#عيش_حرية
#عدالة_إجتماعية
#كرامة_إنسانية
#مخاميخ_مترجمة

تابعونا على الفيسبوك - صفحة مخاميخ