بيتي فور التحرش !

- آلو...مين؟
- أيوه يا باشا...معك المستشار بتاعك.
- وعايز إيه يا مستشار يا بتاعي؟
- حضرتك فيه صفحة سمجة اسمها مخاميخ...
وعمالين يقولوا حضرتك مش بتتحرك علشان تشوف حل شامل لموضوع التحرش.
- حل شامل؟ هي القضية الفلسطينية ؟ 
وبعدين ما أنا قولت لوزير الداخلية يتصدى للموضوع !
- ما هي مخاميخ دي عمالة تسخر من الموضوع ده. وتقول قبضة أمنية وإن حضرتك أبيض يا ورد !
- خلاص خلي وزير الداخلية يتصرف ويجيب مخاميخ من قفاها !
- يا باشا طب وليه...؟
أنت عارف منظمات حقوق المخاميخ ووجع الدماغ اللي أحنا فيه.
- طب نعمل إيه يا مستش ؟!
- أنا شايف إننا نعمل اللي قالوا عليه في مخاميخ.
حضرتك تعمل اجتماع طارئ لمجلس الوزراء ومؤتمر صحفي وشوية صور على أما الأمور تهدى.
- اجتماع "طارق" مين بس؟
أنا مستني مكالمة أوباما من إمبارح !
- حضرتك تقدر تاخود الموبايل بتاع القصر الجمهوري معك.
- ما ينفعش...
مرسي رابط الموبايل بحبل في رجل المكتب...علشان يحافظ على أموال الشعب !
- طب ما تقصوا الحبل؟
- ما مرسي وجماعته واخدين المقص معهم...هو إحنا بنحارب الإرهاب من شوية !
وبعدين حتى لو الموبايل معايا...ما ينفعش أتحرك...
أحنا بنجهز الكحك والبيتي فور...
علشان كبير العرب...هيعمل حفلة علشان نجمع مساعدات علشان خاطر "مسر" !
- قصد حضرتك نتسول !
- أنا مش هسمحلك تقول كده تاني ... !
عموما خليني أبعت إس إم إس...لرئيس الورزاء يعمل لجنة من الأزهر والكنيسة وجميع الجهات المعنية علشان يدرسوا ظاهرة التحرش.
- فكرة جميلة يا باشا...ويا سلام لو تقيل وزير الداخلية !
- أنت مجنون يا بني...أقيل شقيقي...ده أحنا دافنينو سوا.
- طب إيه رأي سعادتك...لو تزور البنت المتحرش بها ؟!
- بس دي حركات مبارك يا بني؟
- لا يا باشا...صدقني...الحركة دي هتاكل قوي مع الناس اللي انتخبت حضرتك.
- أنت هتشتغل نفسك ياض؟ هو فيه حد انتخبني؟
دول كسروا بخاطري ... ومن ساعتها والدمعة ما فرقتش عيوني !
- معلهش علشان خاطري بس...زيارة للبنت...وشوية سهوكة من بتوع حضرتك...والدنيا هتبقى زي الفل !
- حاضر من عينيه...أقوم أغسل إيدي بس من العجين !

تابعونا على الفيسبوك - صفحة مخاميخ

التحرش الجنسي !

هو إيه حكاية فتح باب الدعارة لمواجهة التحرش؟

إيه الخيبة اللي أحنا فيها دي؟هو إيه أختك تعمله بمزاجها ... أحسن ما يتعمل فيها غصب عنها؟

يا خلقأفتحوا باب الحلال واتبعوا شرع الله وسنة رسوله عليه الصلاة والسلام:
" إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره. 

هو اللي أحنا فيه ده مش فتنة وفساد كبير؟

كل واحد عايز يجوز بنته لأمير من الأمراء؟ يا أخي اسمع كلام ربنا:"إِن يَكُونُوا فُقَرَاء يُغْنِهِمُ اللَّهُ مِن فَضْلِهِ وَاللَّهُ وَاسِعٌ عَلِيمٌ"

وقال رسول الله صلى الله عليه وسلم:"يا معشر الشباب، من استطاع الباءة فليتزوج، فإنه أغض للبصر وأحصن للفرج، ومن لم يستطع فعليه بالصوم، فإنه له وجاء" متفق عليه.

هتقولي منين؟ الموضوع عايز اقتصاد وفلوس...وأنا مش قادر أديك.

دور الدولة،،،

يا عم ابتدي باللي تقدروا عليه.أقفلوا المجاري الأخلاقية اللي ضاربة في المجتمع.راقصات وعاريات على قمة المجتمع. وأهو هيتصدروا المشهد في رمضان.
وشوية منتجين ومخرجين وممثلين فشلة - إلا من رحم ربي -ما يعرفوش غير إنتاج هز الوسط والإثارة الجنسية.

أظبطوا منظومة التعليم والدين والثقافة

وقفوا المخدرات .. اللي لحست دماغ الشباب.

أضربوا على يد الفاسدين.ما هو لو حاربنا الفساد...وكل حرامي...عرفنا نرجع فلوس الشعب اللي سرقها.وبعدين بنيت مساكن ووفرت وظائف. ما حدش لا هيتحرش ولا غيره.

دور المجتمع،،،

ربوا عيالكم...مش كل واحد عمال يخلف ويرمي في الشارع. ولا سايب التلفزيون والنت هم اللي يربوا.

كل واحد يصلح نفسه ويتقى الله في عمله.بلاش رشاوي وبلاش محسوبية وبلاش سرقة.

أفتحوا باب الحلال. وأقفلوا منابع الخراب.

وكل واحد يتقي الله في نفسه وبيته وعياله.

"ظَهَرَ الْفَسَادُ فِي الْبَرِّ وَالْبَحْرِ بِمَا كَسَبَتْ أَيْدِي النَّاسِ لِيُذِيقَهُمْ بَعْضَ الَّذِي عَمِلُوا لَعَلَّهُمْ يَرْجِعُونَ"

حسبنا الله ونعم الوكيل.يا رب أنت المستعان.

تابعونا على الفيسبوك - صفحة مخاميخ

حل مشكلة المشردين - مترجم

فقرة مخاميخ مترجمة،،،

في دراسة عن المشردين، قامت بها جامعة نورث كارولينا الأمريكية .

أثبتت الدراسة أن الحل الأمثل لهذه المشكلة، هو توفير مساكن تشمل الخدمات الضرورية لهؤلاء المشردين.

رغم أن حل توفير السكن يبدو كحل مكلف. لكن من الناحية الإقتصادية ووفقا لأرقام وإحصائيات الدراسة، فإن توفير السكن هو الحل الأوفر.

قاموا في الدراسة بتوفير 85 شقة في مدينة تشارلوت في ولاية نورث كارولينا...في بدايات العام 2012.
وقام فريق البحث الجامعي بمتابعة مجموعة من المشردين لمدة عام قبل تسكينهم في الشقق.
ثم متابعتهم لعام آخر بعد تسكينهم.

فوجدوا تحولا دراماتيكيا في الأموال المنفقة على الرعاية الصحية، والخدمات الأمنية والشرطية.

انخفضت الفاتورة الصحية لهؤلاء المشردين من 2.5 مليون دولار إلى 760 ألف دولار.
وانخفضت الحاجة لحالات الطوارئ من 571 إلى 124.

وبالنسبة للشق الأمني.
فقد انخفضت تكاليف القبض على المشردين وحبسهم.
بعد انخفاض عدد حالات القبض على المشردين بنسبة 78%.
وانخفضت فترات حبسهم في السجون بنسبة 84%.

كذلك تزداد الرغبة في العلاج من الإدمان لدى المشردين بعد تسكينهم.

وأختتمت المقالة التي تتحدث عن الدراسة بالقول:
"نعم تسكين المشردين عملية أخلاقية، أكثر من مجرد النظر للتكاليف الخاصة بذلك. لكن ما زالت الدراسة تقدم المساعدة لأخذ الشقين الأخلاقي والإقتصادي في الاعتبار لحل المشكلة"

ترجمة: عدنان القماش.

----
تعليقات مخموخية سمجة:
- طبعا ما تقوليش هو إزاي مشرد وبيقدر يروح يتعالج...دي بلاد متخلفة يا عم الحاج.
مفروض إن مُشرد ... يعني ياخود رصاصة بخمس قروش ونخلص منه !

- وكمان ما حدش يسألني إزاي المُشرد معه كلب في الصورة.
المشردين مقامات حضرتك 

#أنا_مش_قادر_أديك
#إحنا_متراقبين
#عيش_حرية
#عدالة_إجتماعية
#كرامة_إنسانية
#مخاميخ_مترجمة

تابعونا على الفيسبوك - صفحة مخاميخ

ولا يوم من أيامك يا أبو علاء

بمناسبة تزوير الانتخابات...افتكرت نكتة.
--------
أوباما كان قلقان وخايف من الانتخابات...وعبر عن مشاعره دي لمبارك.
مبارك قاله: يا عم لا تقلق ولا حاجة...أنا هبعتلك اتنين عيال من عندي...إنما عفاريت...هيظبطولك الصناديق وهتفضل رئيس.

بعد ما الانتخابات الأمريكية خلصت...جات مكالمة لمبارك من رجالته اللي راحوا يزوروا الانتخابات:
- آلو...مبروك يا ريس...سعادتك نجحت في انتخابات الرئاسة الأمريكية.
--------
بعد المهزلة اللي أحنا فيها دي...اقدر أقول:
مصر خسرتك وخسرت مهارات رجالتك المزورين الأفاضل يا أبو علاء. 
التزوير بقى شغلانة كل من هب ودب 

تابعونا على الفيسبوك - صفحة مخاميخ

جعلوني مرشحا !

يحوم في جنبات مكتبه الفخم. طرقات على الباب. يطلب صاحبها الإذن بالدخول.
يضع الزائر وجهه في الأرض...يقول بصوت منكسر:
- يا زعيم الشعب باعنا !
- إزاي...إزاي...إزاي يحصل كده؟
يدور الزعيم حول مكتبه بعصبية، يرفع سماعة الهاتف...يطلب حضور كل الخبراء الاستراتيجين فورا.

إجتماع مهيب...الصمت يعلو الرؤوس...يتكلم الزعيم بحكمته المعتادة، يحاول الوصول لنبرة حليم:
- إيه اللي حصل؟ ما أحنا كنا ملبسين الشعب السلطانية؟!
لا يجيب أحد...
- يا ولادي ردوا علي...أنتوا مش بترودا عليه ليه؟
يرفع أحدهم يده طالبا الأمان...يسمح له الزعيم بالكلام:
- يا باشا ما فيش أي فرق...غير فرق واحد ...!
يرتجف المتحدث في كرسيه...قبل أن يقول له الزعيم: 
- قول...ما تخفش...إيه الفرق؟
- الفرق إنك اتكلمت ... و الناس عرفت...
قبل أن يكمل...أخرج الزعيم مسدسه، أطلق النار على رأس المتحدث.
نظر الزعيم إلى السقف متأملا...قال بصوت حزين:
- مع إني طلبت منهم ما يكسروش بخاطري؟
انتفض فجأة وهو يصرخ:
- أندهولي خالد يوسف !

يرن الهاتف ...يرفع الزعيم السماعة مسرعا:
- خالود...؟
- هالود مين؟
يرتجف صوت الزعيم:
- أوب...أوب...أوباما؟
- إيه النيلة دي؟ أنت فاشل هبيبي...فاشل !
أنا غلطان إني سمعت كلام الخبراء ونزلت بك !
- يا باشا اديني فرصة...أنا همد الانتخابات حتى لو عشر سنين...الشعب بس "منيأ" شوية ؟!
- لازم تحل المشكلة...وعموما خليني أبعتلك ستيفن سبيلبيرج...هو هيظبطلك كل حاجة ؟!

وضع الزعيم السماعة...قال ونظره شارد:
- أدوهم بكره أجازة...ولو ما جبتش معهم...مدوا الانتخابات كمان يوم....ولو فضلوا راكبين دماغهم...هنضرب لهم كرسي في اللمبة الموفرة !
صرخ الحاضرون: هنعمل إيه؟
- هنجيبهم من بيوتهم في عربيات الخضار...!!!
- طب لو طنشوا برضو؟!
- هنقتلهم ونقول عليهم إخوان !

تابعونا على الفيسبوك - صفحة مخاميخ

المرأة المصرية والانتخابات

عمالين يقولوا المرأة المصرية هي الأكثر مشاركة في الانتخابات.
طب مش كفاية إننا مستحملين كذبة إن عندنا ستات في مصر.
كمان هيكذبوا ويقولوا فيه إنتخابات؟
----
حد يشوف لي مكان أبيت فيه النهاردة بقى يا ردالة 

تابعونا على الفيسبوك - صفحة مخاميخ

الخناقات المصرية الحديثة

يدخل الزوج البيت مبتهجا، ينادى زوجته:
- حبيبتي وحشتيني.
ترد النداء بسعادة، تبتسم ابتسامة ساحرة:
- وأنت كمان وحشتني يا حبيبي.
- طب ألحقيني بالأكل أصل حبيبك هيموت من الجوع.
- أكل إيه؟
- الأكل يا روحي..الغدا؟
- غدا؟ بتاع إيه؟ ما أنت عارف إني مش بعرف أطبخ كويس. وبصراحة زهقت من المحاولة.
- يا حبيبتي أي حاجة منك جميلة...مش مهم يبقى بيرفكت يعني.
- أنا ما عرفش بقى...وبعدين أنت ما قولتليش ليه...قبل ما تخليني أسيب بيت أهلي؟
- يا حبيبتي أقول إيه؟ ده موضوع معروف من غير قواله.
- لا... كان لازم تقولي. قبل ما تخليني أسيب بيت أهلي.
- طب أهدي يا حبيبتي...ما تزعليش...خلينا نحط النقط على الحروف. تحبي أخلف أنا المرة الجاية؟
------
الخناقات المصرية الحديثة...من وحي أقوال الزعيم الحكيم !


تابعونا على الفيسبوك - صفحة مخاميخ