من وجهة نظري...المشكلة مش في الدستور... ودائما بقول الشعب هو اللي بيحمي الدستور مش العكس... طبعا لازم الدستور يتكتب صح... بس المشكلة إننا محتاجين تعليم وأخلاق... البلد بالحالة اللي فيها دي...ما ينفعش فيها ولا خمسين دستور...
يعني مثلا كام واحد هيقدر يقول للضابط طلع الكارنية بتاعك؟ وكام ضابط هيحترم نفسه ويطلع الكارنية قبل ما يتكلم معك؟
طبعا فيه ناس هتدافع عن حقوقها..والناس دي بتعمل كده من الأول... مش محتاجة دستور يعني... لكن أنا بتكلم عن الغالبية والناس الغلابة بتوع يا بيه ويا باشا... في أمريكا مثلا... الضابط ممكن يطلع عينك...وغالبا بيبقى أد الثور ويقدر يعدمك العافية... بس هو بيعاملك باحترام علشان فيه قانون هيطلع عينه...وكمان هو في الغالب متربي ومتعلم كويس... إذا دستور نضيف، قوانين نضيفة، وناس متعلمة ومتربية... فيما عدا ذلك أبقى قابلني... *** عدنان القماش 12 12 2012 نفس تاريخ ميلاد كائن العوكش...13 13 2013
فيما يخص المادة 35 والقبض على المواطن والتلبس والحوار اللي عامل مشكلة في الدستور، نقول: الفكرة في المبدأ يا سادة يا كرام...لو المبدأ القانوني سليم يبقى قشطة... بس لو فيه غلط في التنفيذ...وأحنا عارفين إنه بيحصل...يبقى لازم المادة تراعي النقطة دي... يعني مثلا يكتبوا: وأي ضابط هيمسك مواطن ويلبسه حتة حشيش...على الدولة أنها تطلع عين اللي جابوه... اللي جابوه دي راجعه على المواطن طبعا :D *** عدنان القماش
يا جدعان سياسة الحكومة دي واضحة زي الشمس
رئيس حكومة يقولك أقعدوا في غرفة واحدة علشان التكييف
ورئيس دولة يقولك كله يحضن بعضه
وبعد السجاير ما غليت الشعب كله هيخمس
وشعار المرحلة هيبقى: "قوتنا في لمتنا"
المجد للباك فاير :D
***
عدنان القماش
10 ديسمبر 2012
أنتوا مش واخدين بالكم من أفضل حاجة في قصة المحلة الفشنك دي.
ألا وهي أننا هنافس أمريكا في تجربتها الديموقراطية,,,
هيبقى عندنا حزب "البغل".
ويبقى عندنا مواطن عادي، ومواطن بالزيت الحار... :D
***
عدنان القماش
8 ديسمبر 2012
يا جماعة الخير... لا قدر الله، لو ناوين على حرب أهلية.
ممكن تخلوها في أجازة الصيف؟
ما هو مش ممكن يعني الواحد يبقى لسه دافع مصاريف المدارس...والعيال تقعد في البيت من دلوقتي...طب نحلل القرشانات الله يهديكم :D
***
عدنان القماش
7 ديسمبر 2012
النهاردة تحس سيادتك إنك نقلت الدركسيون من الشمال لليمين
اللي كانوا في الميدان عمالين يقللوا من قيمة الحشود اللي عند جامعة القاهرة...
وبعدين انتشرت في الجيزة كلها...
وإزاي المنطقة بتاعتهم ثغنططة وإزاي الحشود لا تعني الكثير في قيمتها...
والجمعة الجاية الدركسيون يرجع تاني شمال سعادتك
واللي عند جامعة القاهرة يرجعوا يقللوا من قيمة الحشود في الميدان...
وإزاي إنه ميدان الفلول وإلهام شاهين والعملاء والخونة...
وبين هذا وذاك...
يطلع الدستور ويسقط الإعلان الدستوري وتنتهي القصة...
وندخل على انتخابات مجلس الشعب
ونرجع ندور على الناس اللي ما استعدتش للانتخابات
***
عدنان القماش
1 ديسمبر 2012